აშშ-ის მოქმედი პრეზიდენტის დონალდ ტრამპის მხარდამჭერები ვაშინგტონში, Freedom Plaza-ზე იკრიბებიან, სადაც მასობრივი აქცია იმართება.
აქციის მონაწილეთა შეკრების ადგილი თეთრი სახლის სიახლოვეს მდებარეობს. ამიტომ პოლიციელებმა მიმდებარე კვარტლები გადაკეტეს. მანიფესტანტები ამ ადგილისკენ მცირე ჯგუფებით მიემართებიან.
პრეზიდენტის რეზიდენციის მოპირდაპირე მხარეს, ტრამპის მომხრეებს მისი მოწინააღმდეგეები ხვდებიან შეძახილებით: "წააგე" და "წაეთრიე".
ტრამპის მხარდამჭერი აქციის მონაწილეებმა მედიას უთხრეს, რომ ხმების მოპარვის შესაჩერებლად იკრიბებიან. ისინი დარწმუნებულები არიან, რომ თუ "ხმების ქურდებს" წინ აღუდგებიან ტრამპი არჩევნებში გაიმარჯვებს.
შეერთებულ შტატებში საპრეზიდენტო არჩევნები 3 ნოემბერს გაიმართა.
იმის მიუხედავად, რომ ჯო ბაიდენი გამოცხადდა საპრეზიდენტო არჩევნებში გამარჯვებულად, ტრამპი ჯერ კიდევ არ აღიარებს მისი დემოკრატი მეტოქის გამარჯვებას.
შეერთებული შტატების მოქმედი პრეზიდენტი, ყოველგვარი მტკიცებულების გარეშე ამტკიცებს, რომ სულ მცირე 2.7 მილიონი ხმა "მოპარეს".
შეერთებული შტატების ფედერალური არჩევნების უსაფრთხოებაზე პასუხისმგებელი უწყებების განცხადებით, 2020 წლის 3 ნოემბრის არჩევნები "ამერიკის ისტორიაში ყველაზე უსაფრთხო" იყო.
მათი განცხადებით, არ არსებობს არავითარი მტკიცებულება იმისა, რომ ხმის მიცემის რომელიმე სისტემამ წაშალა, დაკარგა ან შეცვალა ხმები, ან რაიმე ფორმით იქნა კომპრომეტირებული.
ამის შესახებ ნათქვამია ოფიციალურ განცხადებაში, რომელიც შეერთებული შტატების კიბერუსაფრთხოებისა და ინფრასტრუქტურის უსაფრთხოების ბიუროს (CISA) ოფიციალურ ვებგვერდზე გამოქვეყნდა.
CISA-ს განცხადებით, მიუხედავად არაერთი დაუსაბუთებელი ბრალდებისა, სრულიად არინ დარწმუნებულნი, რომ არჩევნები ჩატარდა უსაფრთხოდ და სამართლიანად.
ფოტო: AP