შეერთებულ შტატებში, ჯორჯიის შტატში საპრეზიდენტო არჩევნებში მიღებულ ხმებს ხელახლა გადაითვლიან. ამის შესახებ შტატის სახელმწიფო მდივანმა ბრედ რაფენსპერგერმა განაცხადა.
"ჯორჯიაში კანდიდატები ხმების რაოდენობის მიხედვით ძალიან ახლოს არიან ერთმანეთთან. დაახლოებით ხუთი მილიონი ბიულეტენი გვაქვს. სხვაობა კანდიდატებს შორის რამდენიმე ათასია. ასეთი მცირე სხვაობის გათვალისწინებით, ჯორჯიაში ხმებს ხელახლა გადავითვლით, ვინაიდან საბოლოო შედეგს დიდი მნიშვნელობა აქვს ჩვენი ქვეყნისთვის", - განაცხადა რაფენსპერგერმა.
მანამდე, პრეზიდენტ დონალდ ტრამპის შტაბმა იმედი გამოთქვა, რომ ჯორჯიაში ხელახალი გადათვლის შემთხვევაში, "უკანონოდ შევსებული ბიულეტენები" მოიძებნება და შტატში მათი კანდიდატი გაიმარჯვებს.
ჯორჯიის შტატს საარჩევნო კოლეგიაში 16 ხმა აქვს.
ტრამპი ხმების მიტაცებასა და გაყალბებაში ადანაშაულებს როგორც კონკურენტ ჯო ბაიდენს, ასევე საარჩევნო ადმინისტრაციის წარმომადგენელს.
ის ამტკიცებს, რომ გადამწყვეტ შტატებში დიდი უპირატესობით გაიმარჯვა, მაგრამ შემდეგ მისი ოპონენტისთვის მიცემული ხმები გაიზარდა.
ტრამპს მიაჩნია, რომ ეს შემთხვევით არ მომხდარა, ფოსტით ხმის მიცემას კი კატასტროფა უწოდა.
მიუხედავად ბრალდებებისა, დონალდ ტრამპს ამის დამადასტურებელი არც ერთი მტკიცებულება არ წარმოუდგენია.
ამ დროისთვის, შეერთებული შტატების საპრეზიდენტო არჩევნებში გამარჯვებული ვინაობა უცნობია. რამდენიმე შტატში ხმის დათვლა კვლავ გრძელდება.
ბოლო მონაცემებით, საარჩევნო კოლეგიის წევრთა 253 ხმით ჯო ბაიდენი ლიდერობს, ტრამპს - 214 ხმა აქვს.
