"ლელოს" ლიდერებმა ფიქრია ჩიხრაძემ და ლანა გალდავამ ბრიფინგი გამართეს, სადაც საარჩევნო დარღვევებზე ისაუბრეს და ფაქტები წარადგინეს.
ფიქრია ჩიხრაძის თქმით, ასეულობით საჩივარია შესული საოლქო კომისიაში, ამდენივე არ არის შესული რადგან ზოგის ანალიზი ვერ მოესწრო.
"ვერ მოხერხდა ყველა ოქმის გასაჩივრება რადგან ძალიან დიდი გაურკვევლობაა თითოეულ მათგანში. წარმოუდგენელია სრული სურათი შეიქმნას მოკლე დროში, რა დროშიც გვევალებოდა ამის გაკეთება.
სამგორის ოლქში 97 უბნის გახსნა და გადათვლა მოხერხდა. ჩვენი ხმები მაჟორიტარულში იყო განულებული, ხოლო პროპორციულში საგრძნობლად დაკლებული. გასაჩივრების შემდეგ დავინახეთ, რომ ჩემი როგორც მაჟორიტარის ხმები გადაყრილი იყო ბათილ ბიულეტენებში. თითქმის ნაგავში, სადაც საერთოდ შეუვსებელი ან გაფუჭებული ბიულეტენებია ჩაყრილი. ამ კონკრეტულ შემთხვევაში დამაკლეს 49 ხმა, ხოლო პარტიას 20. სამაგიეროდ 200 ხმა იყო დამატებული 41 ნომრის სასარგებლოდ. 78 უბანზე უნდა ყოფილიყო 772 და აღმოჩნდა 726. ჯამურად მთელ საქართველოში სადაც 3847 უბანია, ბათილი ბიულეტენების რაოდენობა 3,5 %-ია. დაახლოებით იმდენი რამდენიც დაგვიწერეს რამდენიმე პოლიტიკურ ძალას. თბილისში 5%-ზე მეტია გაბათილებული რადგან აქ ყველაზე მეტად უჭირდათ მაჟორიტარებს მოგება.მადლობა მინდა გადავუხადო, საზოგადოებას, რადგან აქტიურად იყვნენ ჩაბმულები პროცესში,” - განაცხადა ჩიხრაძემ.
ჩიხრაძის თქმით მიუხედავად დაძაბული ვითარების საოლქო კომისიები, არ აპირებენ უბნის ხელახლა გადათვლას, რადგან მათი თქმით ყოველი მეორე გასაჩივრებულია და ამდენს ვერ გადათვლიან.
"125 მუხლი ცენტრალურ საარჩევნო კომისიას აძლევს უფლებას, როდესაც ასეთი მასშტაბური დარღვევებია, გადაითვალოს ყველა ოლქში უბნები, რომ რეალურად დავინახოთ რა მოვლენასთან გვაქვს საქმე. რადგან ასეთი გაყალბებული არჩევნები გაყალბების ბევრჯერ მნახველ ქართველ ხალხს და პოლიტიკას არ ახსოვს. უნდა მოხდეს იმ ადამინების იდენტიფიკაცია ვინც ამ გაყალბებებში მონაწილეობდა და შესაბამის პასუხისმგებლობაში მიეცნენ ისინი. პირადად მე მაქვს 87 უბნის ოქმი, სადაც ვინმე ხათუნა აწერს სახელს გვარის გარეშე, ეს არის გაყალბების ერთ-ერთი მცდელობა. თუ ამ საკითხს ახლა არ მივხედავთ ვერასდროს ვერ ვეღირსებით დემოკრატიულ არჩევნებს", - განაცხადა ჩიხრაძემ.
