რუსეთის ჯანდაცვის სამინისტრომ ექიმებს კორონავირუსთან დაკავშირებით საჯაროდ საუბარი აუკრძალა.
რუსეთის ფედერაციის ჯანდაცვის სამინისტრომ ექიმებსა და სამედიცინო დაწესებულებებს გაუგზავნა ბრძანება კორონავირუსის შესახებ ნებისმიერი საზოგადოებრივი კომენტარის კოორდინაციის შესახებ. აღნიშნული ბრძანება ხელთ ჩაუვარდა რუსულ გამოცემას Meduza-ს.
"ახალი კორონავირუსის შესახებ ნებისმიერი კომენტარი და საჯარო ინფორმაცია, წერილობითი ან ზეპირი სახით გადმოცემული, წინასწარ უნდა შეთანხმდეს ჯანდაცვის სამინისტროს პრესსამსახურთან ელექტრონული ფოსტით ან ტელეფონით", - ვკითხულობთ ბრძანებაში.
მოგვიანებით, ამ ბრძანების ნამდვილობა Meduza-სთან საუბრისას დაადასტურა ჯანდაცვის სამინისტროს პრესსამსახურმა.
ჯანდაცვის სამინისტროს განმარტებით, ეს ბრძანება მოსახლეობის ინფორმირებულობის ეფექტურობის გაზრდის სურვილით არის ნაკარნახევი.
რუსეთის ჯანდაცვის სამინისტროს განცხადებით, საინფრმაციო ველი გადატვირთულია კორონავირუსის შესახებ არც თუ ისე აუცილებელი მრავალი ფაქტით, ვარაუდებით, სხვადასხვა სპეციალისტის მოსაზრებებითა და პროგნოზებით, რამაც საჭირო გახადა ამგვარი რეგულაციის აუცილებლობა.
