გერმანიის კანცლერმა ანგელა მერკელმა კორონავირუსის შემთხვევების მზარდი გავრცელების აღსაკვეთად 2 ნოემბრიდან ახალი შემზღუდავი ზომების ამოქმედების შესახებ განაცხადა.
კანცლერის თქმით, შეზღუდვები, რომლებიც 2 ნოემბრიდან შევა ძალაში, სულ მცირე თვის ბოლომდე გასტანს. შემდგომ პერიოდზე გადაწყვეტილებას კი ეპიდემიოლოგიური ვითარების შესაბამისად მიიღებენ.
ანგელა მერკელმა შეზღუდვების დაწესების შესახებ გადაწყვეტილება გერმანიის ფედერალური მიწების ხელმძღვანელებთან ხანგრძლივი კონსულტაციების შემდეგ მიიღო.
2 ნოემბრიდან გერმანიის მთელ ტერიტორიაზე მუშაობას შეაჩერებენ საოპერო თეატრები, საკონცერტო დარბაზები, კინოთეატრები, მუზეუმები, გასართობი ცენტრები, ფიტნეს დარბაზები, საცურაო აუზები, ბარები, კლუბები და აკვაპარკები. რესტორნები გააგრძელებენ მუშაობას მხოლოდ შინ მიტანის სერვისის ფარგლებში.
გარდა ამისა, დაიხურება სილამაზის სალონები, მასაჟის სალონები და კოსმეტიკური ცენტრები.
მაღაზიები გააგრძელებენ მუშაობას სოციალური დისტანციის მკაცრი დაცვის პირობით.
სკოლები და ბაღები გააგრძელებენ მუშაობას.
ანგელა მერკელის თქმით, ადამიანებს გარეთ გასვლა მხოლოდ საკუთარ და კიდევ ერთ სხვა ოჯახის წევრებთან ერთად შეეძლებათ.
"საცხოვრებელ სახლებში კერძო წვეულებები მიუღებელია და ჩვენ ამაზე კონტროლს კიდევ უფრო გავამკაცრებთ", - თქვა კანცლერმა.
მერკელმა ასევე მოუწოდა მოქალაქეებს, რომ თავი შეიკავონ ტურისტული მიზნებით მოგზაურობისაგან.
