შინაგან საქმეთა მინისტრი ვახტანგ გომელაური ზუგდიდში ჩავიდა.
გომელაური ზუგდიდში, სამხარეო პოლიციის შენობაში მოადგილესთან, ვლადიმერ ბორცვაძესა და ცენტრალური კრიმინალური პოლიციის უფროსი მამუკა ჭელიძესთან ერთად იმყოფება.
შინაგან საქმეთა სამინისტროს მაღალჩინოსნების ზუგდიდში ვიზიტი სავარაუდოდ, რამდენიმე დღის წინ, საქართველოს ბანკის ფილიალზე მომხდარ თავდასხმას უკავშირდება.
შეგახსენებთ, 21 ოქტომბერს, ზუგდიდში, ზვიად გამსახურდიას გამზირზე მდებარე ბანკის ფილიალზე განხორციელდა შეიარაღებული თავდასხმა, რომლის დროსაც დამნაშავემ 43 მოქალაქე აიყვანა მძევლად.
თავდამსხმელი 500 000 დოლარს და ვერტმფრენით ან ავტომანქანით ტერიტორიის დატოვებას ითხოვდა.
დღის განმავლობაში მძევლების უდიდესი ნაწილი ეტაპობრივად გათავისუფლდა, რომლებსაც სამეგრელო-ზემო სვანეთის პოლიციის დეპარტამენტის დირექტორი ავთანდილ გალდავა ჩაენაცვლა.
მოგვიანებით, ავთანდილ გალდავამ და სამმა მძევალმა, თავდამსხმელთან ერთად დატოვა ბანკის შენობა.
ბოლო ინფორმაციით, თავდამსხმელმა სამი მძევალი სოფელ კირცხის ტყეში გაათავისუფლა და მიიმალა.
