არსებული ინფორმაციით, “საქართველოს ბანკზე“ თავდამსხმელმა სამი მძევალი ჩხოროწყუს რაიონის სოფელ კირცხის ტყეში გაათავისუფლა, რის შემდეგაც მიიმალა
არსებული დაუდასტურებელი ინფორმაციით, ზუგდიდში “საქართველოს ბანკის“ ფილიალზე თავდამსხმელმა სამი მძევალი ჩხოროწყუს რაიონის სოფელ კირცხის ტყეში გაათავისუფლა დამიიმალა.
დამნაშავის სამძებრო სამუშაოები მიმდინარეობს.
მძევლების ჯანმრთელობის მდგომარეობა დამაკმაყოფილებელია. მათ რაიმე სახის დაზიანებები არ აღენიშნებათ. მძევლების დაკითხვა წუხელ მთელი ღამის განმავლობაში მიმდინარეობდა.
შეგახსენებთ, შეიარაღებული თავდამსხმელი ზუგდიდში, საქართველოს ბანკის ფილიალში 21 ოქტომბერს, 14:27 სთ-ზე, რამდენიმე გასროლის შემდეგ შეიჭრა. თავდაპირველი ინფორმაციით, მან მძევლად 19 პირი აიყვანა, თუმცა მოგვიანებით შსს-მ განცხადებაში აღნიშნა, რომ მძევლად 43 მოქალაქე იყო აყვანილი.
მანამდე თავდამსხმელმა რამდენიმე მძევალი გაათავისუფლა და ხელისუფლებას ულტიმატუმი წაუყენა, მან 500.000 დოლარი, მანქანა ან ვერტმფრენი და პერიმეტრიდან სპეცრაზმის გაყვანა მოითხოვა. მასთან მოსალაპარაკებლად მოგვიანებით, სამხარეო პოლიციის უფროსი შევიდა, რომელიც მძევლებს, სავარაუდოდ, მისივე სურვილით ჩაენაცვლა.
