რუსი ჰაკერების თავდასხმის სამიზნე ტოკიოს ოლიმპიური თამაშებიც გახდა, რომელიც წელს უნდა გამართლიყო, თუმცა კორონავირუსის პანდემიის გამო გადაიდო.
ბრიტანეთის დაზვერვის სამსახურის ინფორმაციით, რუსი ჰაკერები ოლიმპიური თამაშების ჩაშლას ისახავდნენ მიზნად.
ბრიტანეთის საგარეო საქმეთა სამინისტროს განცხადებით, რუსეთის „გრუ“-ს სამხედო დაზვერვამ განახორციელა ოლიმპიური თამაშების ოფიციალური პირებისა და მონაწილეების "კიბერდაზვერვა".
როგორც იუწყებიან, სავარაუდო კიბერთავდასხმები ოლიმპიური თამაშების გადადების გადაწყვეტილების გამოცხადებამდე განხორციელდა.
"ჩვენ მკაცრად ვგმობთ ასეთ მოქმედებებს", - განაცხადა გაერთიანებული სამეფოს საგარეო საკითხთა მდივანმა, დომინიკ რააბმა აღნიშნული თემის კომენტირებისას.
"დიდი ბრიტანეთი გააგრძელებს მოკავშირეებთან მუშაობას პოტენციური კიბერშეტევების თავიდან ასაცილებლად და მათ წინააღმდეგ გასაერთიანებლად“, - დასძინა რააბმა.
ბრიტანეთის მხარე არ აკონკრეტებს კიბერშეტევის შინაარსსა და მასშტაბებს.
მანამდე, შეერთებული შტატების იუსტიციის დეპარტამენტმა „გრუს“ ექვს ოფიცერს სხვა ქვეყნების, მათ შორის საქართველოს ინფრასტრუქტურის დაზიანების მიზნით ჰაკერული შეტევების განხორციელებაში ბრალი წაუყენა.
აღნიშნული დაჯგუფება ცდილობდა ჩაეშალა 2018 წლის ზამთრის ოლიმპიური თამაშები, 2017 წლის საფრანგეთის საპრეზიდენტო არჩევნები და მწყობრიდან გამოეყვანათ უკრაინის ელექტროსისტემა.