შეერთებული შტატების პრეზიდენტის, დონალდ ტრამპის განცხადებით, ხალხი დაიღალა კორონავირუსის შესახებ ინფორმაციის მოსმენით და აშშ-ის ალერგიისა და ინფექციური დაავადებების ეროვნული ინსტიტუტის დირექტორს, ენტონი ფაუჩის "კატასტროფა" უწოდა. როგორც CNN-ი იუწყება, ტრამპმა ეს განცხადება საარჩევნო კამპანიის ფარგლებში, მოსახლეობასთან შეხვედრისას გააკეთა.
ტრამპის თქმით, ენტონი ფაუჩისთვის რომ მოესმინა აშშ-ში ნახევარი მილიონი ადამიანი [კორონავირუსისგან] გარდაიცვლებოდა.
"ხალხი დაიღალა კორონავირუსით. მე უზარმაზარ შეხვედრებს ვაწყობ ამომრჩევლებთან, ისინი ამბობენ - უბრალოდ შეგვეშვით. ისინი დაიღალნენ. ხალხი დაიღალა ფაუჩისა და ყველა ამ იდიოტის მოსმენით. ფაუჩი კარგი კაცია. ის 500 წელია ამ თანამდებობას იკავებს", - განაცხადა ტრამპმა.
რამდენიმე წუთის შემდეგ, პრეზიდენტმა განაცხადა, რომ "ფაუჩი კატასტროფაა".
"ფაუჩი კატასტროფაა. მისთვის რომ მომესმინა 500 ათასი ადამიანი გარდაცვლილი იქნებოდა. მანამდე ამბობდა, რომ 700-800 ადამიანი გარდაიცვლებაო", - დასძინა ტრამპმა.