საქართველოს მესამე პრეზიდენტის, მიხეილ სააკაშვილის თქმით, ყველა განწყობა იმაზე მიუთითებს, რომ "ქართულ ოცნებას" არჩევნები წაგებული აქვს. ამის შესახებ სააკაშვილი ვიდეომიმართვაში ამბობს.
მიხეილ სააკაშვილი ხელისუფლებას ურჩევს, რომ არ გადადოს არჩევნები.
"ხელისუფლებას აქვს ორი არჩევანი - გადადოს არჩევნები და მიიღოს, პრაქტიკულად ნული ხმები, ეს მათთვის ძალიან ცუდი სცენარია ან ჩაატაროს არჩევნები და გადავიდეს ოპოზიციაში საკმაოდ სერიოზული წარმომადგენლობით პარლამენტში იმიტომ, რომ ჯერ კიდევ აქვს შანსი იყოს სერიოზული ოპოზიცია.
ყველა ციფრი, ყველა განწყობა მიუთითებს იმაზე, რომ მათ არჩევნები აქვთ წაგებული ძალიან სერიოზულად, ამას საერთოდ წყალი არ გაუვა, როგორც არ უნდა იკლაკნებოდნენ და რა არგუმენტებიც არ უნდა მოჰყავდეთ. ამაში ვარ უბრალოდ დარწმუნებული...
ახლა ისინი იყენებენ კოვიდინფექციას, რომელიც თვითონ შეუგნებულად გაუშვეს ხელიდან კორუფციის გამო, უტვინობის გამო, ტყუილების გამო და ახლა საქართველომ ყველა რეკორდი მოხსნა. ერთ სულ მოსახლეზე თითქმის ორჯერ უსწრებს უკრაინას, სადაც ასევე მძიმე მდგომარეობაა", - განაცხადა სააკაშვილმა.
მიხეილ სააკაშვილი აცხადებს, რომ თუ პოლიტიკური ნება არსებობს, არჩევნების უსაფრთხოდ ჩატარება შესაძლებელია და ხელისუფლებას სამხრეთ კორეის მაგალითის გათვალისწინებისკენ მოუწოდებს.
"კარგად შეისწავლეთ სამხრეთ კორეის გამოცდილება. ძალიან უსაფრთხოდ შეიძლება არჩევნების ჩატარება, თუ არსებობს პოლიტიკური ნება", - დასძენს სააკაშვილი.
შეგახსენებთ, დღეს საქართველოს პრემიერ-მინისტრმა, გიორგი გახარიამ განაცხადა, რომ არჩევნები არ გადაიდება.
