გერმანიის კანცლერმა ანგელა მერკელმა, კორონავირუსული ინფექცის რაოდენობის მკვეთრი ზრდის ფონზე, მოსახლეობას შინ დარჩენისკენ მოუწოდა.
"ჩვენ ყველაფერი უნდა გავაკეთოთ, რომ ვირუსი არ გავრცელდეს უკონტროლოდ. ყოველი დღე მნიშვნელოვანია", - თქვა მერკელმა ყოველკვირეულ ვიდეომიმართვაში.
კანცლერმა კიდევ ერთხელ მოუწოდა თანამოქალაქეებს, დარჩნენ სახლში და ყოველგვარი არააუცილებელი გადაადგილებისგან თავი შეიკავონ.
"გთხოვთ, თავი შეიკავოთ ნებისმიერ მოგზაურობისგან, რომელიც არ არის აუცილებელი, ნებისმიერი დღესასწაულის აღნიშვნისგან, რომელიც ნამდვილად არ არის აუცილებელი. გთხოვთ, სადაც უნდა იყოთ, შეძლებისდაგვარად, დარჩით სახლში", - განაცხადა კანცლერმა.
მერკელის განცხადებით, გერმანია ამჟამად პანდემიის ძალზედ სერიოზულ ფაზაში იმყოფება და დასძინა, რომ ინფიცირების ახალი შემთხვევების რიცხვი ყოველდღიურად ნახტომისებურად იზრდება.
"შედარებით მოდუნებული ზაფხული დასრულდა. ახლა ჩვენ რთული თვეები გველოდება. როგორ იქნება ზამთარი, როგორ იქნება შობა, გადაწყდება უახლოეს დღეებში და კვირებში. ამას ყველა ჩვენი გადაწყვეტილება გადაწყვეტს", - აღნიშნა ანგელა მერკელმა.
მან გერმანელებს სოლიდარობისა და თავშეკავებისკენ მოუწოდა, როგორც ეს პანდემიის საწყის ეტაპზე გააკეთეს.
"რატომ მივიღეთ ის კარგი შედეგები პანდემიის პირველი ნახევრის განმავლობაში? იმიტომ რომ ჩვენ ვიდექით ერთად და ვიცავდით წესებს. ეს არის ყველაზე ეფექტური საშუალება, რომელიც ამჟამად გვაქვს პანდემიის წინააღმდეგ და ახლა ის უფრო აუცილებელია, ვიდრე ოდესმე", - განაცხადა გერმანიის კანცლერმა.
გერმანიაში, ბოლო 24 საათის განმავლობაში, კორონავირუსით ინფიცირების 7 830 ახალი შემთხვევა გამოვლინდა. რობერტ კოხის ინსტიტუტის მონაცემებით, ეს პანდემიის დაწყებიდან ყველაზე მაღალი მაჩვენებელია.