დამნაშავე, რომელმაც 16 ოქტომბერს სკოლის ისტორიის მასწავლებელს თავი მოკვეთა პარიზის გარეუბანში, არის 18 წლის ჩეჩენი, დაბადებული მოსკოვში. ამის შესახებ შაბათს, 17 ოქტომბერს, საფრანგეთის ეროვნულმა ანტიტერორისტულმა პროკურატურამ განაცხადა, რომელიც ამ დანაშაულს იძიებს.
ფრანგული მედიის ცნობით, აბდულაჰ ა. საფრანგეთში ჩავიდა მშობლებთან ერთად, რომლებმაც ათი წლის წინ ლტოლვილის სტატუსი მიიღეს.
როგორც იუწყებიან, პოლიციამ არაფერი იცოდა მისი რადიკალური შეხედულებების შესახებ.
ანტიტერორისტული პროკურატურის ხელმძღვანელის, ჟან ფრანსუა რიკარის განცხადებით, თავდასხმამდე ცოტა ხნით ადრე, დამნაშავე მოსწავლეებს მიუახლოვდა ქუჩაში და სთხოვა, მიეთითებინა თუ ვინ იყო მასწავლებელი.
თავდასხმის შემდეგ, აბდულაჰ ა-მ Twitter- ზე გამოაქვეყნა მასწავლებლის ცხედრის ფოტო, რომელსაც თან ახლდა შეტყობინება, რომ მკვლელობა მან ჩაიდინა.
47 წლის მსხვერპლი სამუელ პ. მუშაობდა ისტორიისა და გეოგრაფიის მასწავლებლად პარიზის კონფლან-სენ-ონორინის გარეუბნის კოლეჯში.
სიტყვის თავისუფლების შესახებ გაკვეთილზე, მან თავის მოსწავლეებს აჩვენა წინასწარმეტყველ მუჰამედის კარიკატურები, რომელიც გამოქვეყნდა სატირული გამოცემის Charlie Hebdo-ს მიერ.
სააგენტო AFP-ის ცნობით, ამის შემდეგ, მასწავლებელმა რამდენიმე მოსწავლის მშობლისგან მუქარა მიიღო. მუქარების შესახებ მასწავლებელმა სკოლის ადმინისტრაციას და პოლიციას შეატყობინა.
მოწმეები ირწმუნებიან, რომ სამზარეულოს დანით შეიარაღებული თავდამსხმელი ყვიროდა "ალაჰ აქბარ!
მკვლელობის საქმეზე საფრანგეთის პოლიციამ 9 ადამიანი დააკავა. დაკავებულთა ნაწილი მკვლელის ნათესავია, მათ შორის ერთი არასრულწლოვანი.
ასევე დააკავეს იმ სკოლის მოსწავლეების მშობლები, სადაც მოკლული პედაგოგი მუშაობდა და უამრავი ადამიანი, რომლებიც არ არიან დაკავშირებული სავარაუდო ტერორისტის ოჯახთან.
ფოტო: Reuters