ბელარუსის ოპოზიციის ლიდერ სვიატლანა ციხანოვსკაიაზე რუსეთის შინაგან საქმეთა სამინისტრომ [რუსეთის ტერიტორიაზე] ძებნა გამოაცხადა.
შინაგან საქმეთა სამინისტროს მონაცემთა ბაზის თანახმად, 1982 წელს დაბადებული მოქალაქე სვიატლანა ციხანოვსკაია "ძებნილია სისხლის სამართლის კოდექსის მუხლით". ამავდროულად, მონაცემთა ბაზაში მითითებული არ არის, თუ რომელი მუხლისთვის შეიყვანეს ციხანოვსკაია ძებნილთა სიაში.
სვიატლანა ციხანოვსკაიამ მონაწილეობა მიიღო ბელარუსში 9 აგვისტოს გამართულ საპრეზიდენტო არჩევნებში, სადაც გამარჯვებულად მოქმედი პრეზიდენტი ალიაქსანდრ ლუკაშენკა გამოცხადდა.
ციხანოვსკაია არ დაეთანხმა არჩევნების შედეგებს და საჩივარი შეიტანა ცენტრალურ საარჩევნო კომისიაში. 11 აგვისტოს ცნობილი გახდა, რომ ციხანოვსკაიამ ბელარუსი დატოვა და თავი ლიეტუვას შეაფარა. მოგვიანებით გავრცელებული ცნობით, მას ბელარუსის უსაფრთხოების სამსახურმა აიძულა ქვეყნის დატოვება.
ევროკავშირი და დასავლეთის რამდენიმე ქვეყანა არ აღიარებენ ბელარუსში ჩატარებულ საპრეზიდენტო არჩევნებს და ლუკაშენკას არალეგიტიმურ პრეზიდენტად მიიჩნევენ.
