საქართველოს გენერალურ პროკურატურასთან საქართველო-აზერბაიჯანის საზღვრის დამდგენი კომისიის ყოფილი წევრების ივერი მელაშვილისა და ნატალია ილიჩოვას მხარდამჭერი აქცია დაიწყო.
"ხელისუფლებამ პოლიტიკური ანგარიშსწორებისთვის კიდევ ერთხელ გაწირა ორი უდანაშაულო ადამიანი.
გავაპროტესტოთ ხელისუფლების მორიგი თავგასულობა, ანგარიშწორება, საკუთარი მიზნის მისაღწევად ადამიანების გაწირვა და მხარდაჭერა გამოვუცხადოთ დაკავებულებსა და მათ ოჯახებს", - აცხადებენ აქციის ორგანიზატორები.
საპროტესტო აქციაზე იმყოფებიან სამოქალაქო საზოგადოებისა და ოპოზიციის წარმომადგენლები, რომლებიც დაკავებულებს სოლიდარობას უცხადებენ.
შეგახსენებთ, დღეს, დავით გარეჯის საქმის გამოძიებასთან დაკავშირებით საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა დააკავეს.
