გერმანიის კანცლერი ანგელა მერკელი ბელარუსის ოპოზიციის ლიდერს სვიატლანა ციხანოვსკაიას შეხვდა.
ციხანოვსკაიას პრესსამსახურის ინფორმაციით. შეხვედრა 45 წუთს გაგრძელდა
"შეხვედრისას სვიატლანა ციხანოვსკაიამ ხაზგასმით აღნიშნა, რომ ბელარუსში მიმდინარე საპროტესტო აქციები არ არის ბრძოლა რუსეთის ან ევროპის წინააღმდეგ, ეს ბელარუსის შიდა კრიზისის შედეგია. ახლა ხალხის მთავარი მიზანი არის ახალი არჩევნები. მნიშვნელოვანია, რომ არჩევნები უახლოეს მომავალში ჩატარდეს, რადგან ხალხი 26 წლის განმავლობაში ცხოვრობდა ზეწოლის ქვეშ - და ისინი აღარ აპირებენ ამის ატანას", - იუწყება პრესსამსახური.
ციხანოვსკაიას თქმით, ბელორუსი ხალხი ევროპისგან ელის საინვესტიციო მხარდაჭერას, დამოუკიდებელი მედიისა და სამოქალაქო ორგანიზაციების დახმარებას კრიზისის შედეგების დასაძლევად.
მანამდე ბელარუსის ოპოზიციის ლიდერი სვიატლანა ციხანოვსკაია ვილნიუსში საფრანგეთის პრეზიდენტ ემანუელ მაკრონს შეხვდა.
გავრცელებული ცნობით, შეხვედრაზე ისაუბრეს ახალ, თავისუფალ, დემოკრატიულ არჩევნებზე, რომელის გამართვასაც ოპოზიცია მიმდინარე წლის განმავლობაში მოითხოვს.
"მნიშვნელოვანია, რომ ევროპის ქვეყნებმა ბელარუსში მიმდინარე მოვლენებისადმი გულგრილობა არ გამოიჩინონ. საფრანგეთს, როგორც ერთ-ერთი უძველესი დემოკრატიის ქვეყანას, შესანიშნავად ესმის ჩვენი. ამიტომ ვაპირებ შევახსენო ბატონ მაკრონს ჩვენი მთავარი მიზნის - ახალი, დემოკრატიული და გამჭვირვალე არჩევნების შესახებ, რომელიც ამ წლის განმავლობაში უნდა გაიმართოს", - განაცხადა ციხანოვსკაიმ შეხვედრის დაწყებამდე.
ფრანგული გამოცემა France24-ის ინფორმაციით, იგეგმება ციხანოვსკაიას საფრანგეთის პარლამენტის წინაშე სიტყვით გამოსვლა.
ბელარუსში მასობრივი საპროტესტო აქციები 9 აგვისტოს პრეზდენტის არჩევნების შემდეგ დაიწყო.
აქციის მონაწილეები არჩევნების შედეგებს არ ეთანხმებიან და ხელახალი არჩევნების დანიშვნას მოითხოვენ.
ევროკავშირი არჩევნების შედეგებს არ ცნობს და ლუკაშენკას ლეგიტიმურ პრეზიდენტად არ აღიარებს.
ფოტო: Steffen Seibert
