იმედი გვაქვს, რომ კორონავირუსის საწინააღმდეგო ეფექტური ვაქცინა მზად იქნება ამ წლის ბოლოს, - განაცხადა ჯანმრთელობის მსოფლიო ორგანიზაციის (WHO) ხელმძღვანელმა, ტედროს ადჰანომ ღებრეიესუსმა.
ჯანმო-ს გენერალურის დირექტორის თქმით, პანდემიის დასასრულებლად მსოფლიოს სჭირდება "ყველა ხელსაწყოს" გამოყენება, მათ შორის ვაქცინები.
"ამ წლის ბოლოს იმედი გვაქვს, რომ შეიძლება ვაქცინა მივიღოთ. იმედი არსებობს", - თქვა ღებრეიესუსმა ჯანმო-ს აღმასრულებელი საბჭოს შეხვედრის დასრულების შემდეგ.
ამჟამად, კლინიკურ გამოკვლევებში 40-მდე სხვადასხვა ვაქცინაა, მაგრამ ღებრეიესუსს არ დაუკონკრეტებია, თუ რომელი ვაქცინა იქნება ხელმისაწვდომი წლის ბოლოს.
ჯანდაცვის ექსპერტების განცხადებით, ეფექტური ვაქცინის არსებობა არ ნიშნავს, რომ ცხოვრების ნორმალურ მდგომარეობას ერთბაშად დავუბრუნდებით, რადგან ვაქცინის წარმოებას, განაწილებასა და ადმინისტრირებას დიდი დრო დასჭირდება.
