საფრანგეთის პრეზიდენტმა ემანუელ მაკრონმა განაცხადა, რომ 300 სირიელი მებრძოლი, თურქეთის ქალაქ ღაზიანტეპის გავლით აზერბაიჯანში გადაისროლეს.
"ეს მებრძოლები იდენტიფიცირებულები არიან. ისინი ეკუთვნიან ჯიჰადისტურ დაჯგუფებას, რომელიც მოქმედებს სირიაში, ალეპოს რაიონში", - განაცხადა საფრანგეთის ლიდერმა.
მისი თქმით, მზადდება ამავე რაოდენობის კიდევ ერთი კონტინგენტის გადასროლა.
როგორც მაკრონმა მანამდე განაცხადა, საფრანგეთი ფლობს ინფორმაციას იმის შესახებ, რომ სირიელი მებრძოლები საომარ მოქმედებებში მონაწილეობისთვის ყარბაღში გაემგზავრნენ.
საფრანგეთის, რუსეთისა და აშშ-ის პრეზიდენტებმა, რომლებიც ყარაბაღის საკითხში ეუთოს მინსკის ჯგუფის თანათავმჯდომარეები არიან, გუშინ დაპირისპირებულ მხარეებს მოუწოდეს შეწყვიტონ სამხედრო შეტაკებები და დაიწყონ მოლაპრაკებები ყოველგვარი წინაპირობების გარეშე.
