საქართველოში Covid-19-ით დღეს 5 პაციენტი გარდაიცვალა.
ჯანდაცვის მინისტრის ეკატერინე ტიკარაძის თქმით, ბოლო 24 საათში გარდაცვლილი 5 პაციენტიდან 3 ქუთაისში მკურნალობდა, ხოლო 2 - ბათუმში.
მისივე თქმით, კორონავირუსით დღეს გარდაცვლილი 5 პაციენტიდან 1 ოკუპირებული აფხაზეთიდან, კერძოდ ოჩამჩირედან იყო გადმოყვანილი.
აჭარის ჯანდაცვის სამინისტროს ინფორმაციით, ბათუმში გარდაცვლილი 2 პაციენტიდან ერთი 90 წლის ქალია, მეორე - 57 წლის ქალი. ორივე მათგანი ბათუმის რესპუბლიკურ საავადმყოფოში მკურნალობდა.
აფხაზეთიდან გადმოყვანილი გარდაცვლილი პაციენტი, 69 წლის კაცია, რომელსაც თანმდევი დაავადებები ჰქონდა.
დღეს, საქართველოში კორონავირუსით ინფიცირების 453 ახალი შემთხვევა გამოვლინდა, მათგან 297 აჭარაში, 78 კი თბილისში დადასტურდა.
ბოლო მონაცემებით, ქვეყანაში ახალი კორონავირუსით ინფიცირების 7 093 შემთხვევაა დადასტურებული, მათგან 3714 გამოჯანმრთელდა, 46 კი გარდაიცვალა.
