შეერთებულ შტატებში, 54 წლის ასაკში გარდაიცვალა ტიმოტი რეი ბრაუნი, მსოფლიოში პირველი ადამიანი, რომელიც აივ ინფექციისგან სრულად განიკურნა.
გავრცელებული ცნობით, რეი ბრაუნი გარდაიცვალა 20 სექტემბერს, ლეიკემიასთან 5-თვიანი ბრძოლის შემდეგ.
აივ ინფექციის დიაგნოზი რეი ბრაუნს 1995 წელს დაუსვეს, როდესაც ის ბერლინში ცხოვრობდა.
2007 წელს მას მწვავე მიელოიდური ლეიკემიის დიაგნოზი დაუსვეს. ამ დაავადებისგან განსაკურნებლად პაციენტს ძვლის ტვინის ტრანსპლანტაცია ჩაუტარდა და აღმოჩნდა, რომ აივ ინფექციაც დამარცხდა.
ლეიკემიის რეციდივი რეი ბრაუნმა 2020 წელს განიცადა. ამჯერად მისი ორგანიზამი ლეიკემიის დასამარცხებლად მზად არ აღმოჩნდა და ის გარდაიცვალა.
ძვლის ტვინის ღეროვანი უჯრედების გადანერგვამ აივ ინფიცირებული სხვა პაციენტის სიცოცხლეც გადაარჩინა. 2020 წლის გაზაფხულზე ლონდონელმა ექიმებმა დაადასტურეს, რომ 40 წლის ადამ კასტილეხო მთლიანად განიკურნა აივ ინფექციისგან.