ბელარუსის ოპოზიციის ლიდერი სვიატლანა ციხანოვსკაია მომავალ კვირას გერმანიის კანცლერ ანგელა მერკელთან შეხვედრას გეგმავს. ამის შესახებ ციხანოვსკაიამ ფრანგულ რადიო France International-თან ინტერვიუში განაცხადა.
"მომავალ კვირას ჩვენ შეხვედრა გვაქვს ანგელა მერკელთან"მ - თქვა ციხანოვსკაიამ.
მისივე განცხადებით, "იგი ასევე გეგმავს არაერთ შეხვედრას ევროპაში, რომელთაგან ზოგი ონლაინ რეჟიმში ჩატარდება, ზოგიც პირადად".
"მაგრამ ყველა მათგანი ძალიან მნიშვნელოვანია ჩვენი საკითხის მშვიდობიანი მოგვარებისთვის", - დასძინა ბელორუსის ოპოზიციის ლიდერმა.
შეგახსენებთ, ბელარუსის ოპოზიციის ლიდერი სვიატლანა ციხანოუსკაია ვილნიუსში საფრანგეთის პრეზიდენტ ემანუელ მაკრონს შეხვდა.
გავრცელებული ცნობით, შეხვედრაზე ისაუბრეს ახალ, თავისუფალ, დემოკრატიულ არჩევნებზე, რომელის გამართვასაც ოპოზიცია მიმდინარე წლის განმავლობაში მოითხოვს.
"მნიშვნელოვანია, რომ ევროპის ქვეყნებმა ბელარუსში მიმდინარე მოვლენებისადმი გულგრილობა არ გამოიჩინონ. საფრანგეთს, როგორც ერთ-ერთი უძველესი დემოკრატიის ქვეყანას, შესანიშნავად ესმის ჩვენი. ამიტომ ვაპირებ შევახსენო ბატონ მაკრონს ჩვენი მთავარი მიზნის - ახალი, დემოკრატიული და გამჭვირვალე არჩევნების შესახებ, რომელიც ამ წლის განმავლობაში უნდა გაიმართოს", - განაცხადა ციხანოუსკაიმ შეხვედრის დაწყებამდე.
ფრანგული გამოცემა France24-ის ინფორმაციით, იგეგმება ციხანოვსკაიას საფრანგეთის პარლამენტის წინაშე სიტყვით გამოსვლა.
ბელარუსში მასობრივი საპროტესტო აქციები 9 აგვისტოს პრეზდენტის არჩევნების შემდეგ დაიწყო.
აქციის მონაწილეები არჩევნების შედეგებს არ ეთანხმებიან და ხელახალი არჩევნების დანიშვნას მოითხოვენ.
ევროკავშირი არჩევნების შედეგებს არ ცნობს და ლუკაშენკას ლეგიტიმურ პრეზიდენტად არ აღიარებს.