შეერთებული შტატების პრეზიდენტ დონალდ ტრამპს ვიცე-პრეზიდენტის პოსტზე თავისი ქალიშვილის ივანკას წარდგენა სურდა, როდესაც ის არჩევნებში მონაწილეობდა 2016 წელს. იტყობინება სააგენტო Bloomberg-ი, ტრამპის კამპანიის ყოფილი მენეჯერის რიკ გეითსის წიგნზე დაყრდნობით.
გეითსის წიგნი სახელწოდებით "ტრამპმა მოიგო, მიულერი დამარცხდა და ამერიკამ წააგო" 13 ოქტომბერს გამოიცემა.
"ვიცე-პრეზიდენტის კანდიდატურის განხილვის დროს, რომელსაც ჯარედი [კუშნერი, ივანკას ქმარი] და სხვა ბავშვები ესწრებოდნენ, ყველანი ერთ ოთახში შეიკრიბნენ. ამ დროს ტრამპმა თქვა: "ვფიქრობ, ივანკა ჩემი ვიცე-პრეზიდენტი უნდა იყოს", რის შემდეგაც ოთახში სიჩუმე ჩამოვარდა", - წერია წიგნიდან ამონარიდში, რომელსაც Bloomberg-ი ავრცელებს.
ავტორის თქმით, ივანკა ტრამპის ამ წინადადებამ გააკვირვა, თუმცა პრეზიდენტი აგრძელებდა ივანკას ქებას, "ის არის ბრწყინვალე, ჭკვიანი, ლამაზი და ხალხს უყვარს".
"ამ დღის შემდეგ, დონალდ ტრამპი კიდევ რამდენჯერმე დაუბრუნდა ივანკას კანდიდატურის განხილვას, რაც მისი განზრახვის სერიოზულობაზე მიუთითებდა", - ვკითხულობთ ამონარიდში.
ავტორის თქმით, ივანკას კანდიდატურასთან დაკავშირებით საარჩევნო შტაბმა ამომრჩეველთა განწყობის გამოსარკვევად ორი კვლევაც კი ჩაატარა.
როგორც წიგნის ავტორი წერს, ამ საკითხს თავად ივანკა ტრამპმა დაუსვა წერტილი.
"ის [ივანკა] მივიდა მამამისთან და უთხრა, რომ ეს არ არის კარგი იდეა. ამის შემდეგ ტრამპმა უარი თქვა თავის წინადადებაზე", - წერს ავტორი.
2016 წელს დონალდ ტრამპმა, წინასაარჩევნო კამპანიის მიმდინარეობისას, ვიცე-პრეზიდენტად ინდიანის შტატის მაშინდელი გუბერნატორი, მაიკ პენსი დაასახელა, რომელიც დღესაც იკავებს ვიცე-პრეზიდენტის თანამდებობას.