აზერბაიჯანელ პროფესორს, ჯამილ ალიევს საქართველოს მეცნიერებათა ეროვნული აკადემიის საპატიო წევრის სტატუსი მიანიჭეს.
როგორც მეცნიერებათა აკადემიაში გამართულ პრესკონფერენციაზე საქართველოს შრომის, ჯანმრთელობისა და სოციალური დაცვის მინისტრმა სანდრო ურუშაძემ განაცხადა, ძალიან მნიშვნელოვანია ჯამილ ალიევს მეცნიერებათა აკადემიის საპატიო წევრობა.
"პირადად ჩემთვის ეს დიდი პატივია და მინდა მას მივულოცო", - აღნიშნა ურუშაძე.
ამასთან, როგორც აზერბაიჯანელმა პროფესორმა აღნიშნა საქართველოს მეცნიერებათა აკადემიასთან ერთად უკვე დაიწყო მუშაობა და შესაბამის სამეცნიერო კვლევებსაც ატარებს.
"მე ვარ ამაყი, რომ მეცნიერებათა აკადემიის საპატიო წევრად ამირჩიეს, რადგან საქართველოს მეცნიერებათა აკადემია ერთ-ერთი ძველი და მოწინავეა. მინდა აკადემიის წევრებს ასეთი ნდობის გამოცხადებისთვის მადლობა გადავუხადო," - აღნიშნა ალიევმა.
შეგახსენებთ, რომ ჯამილ ალიევი 1946 წელს ბაქოში დაიბადა. დაამთავრა აზებაიჯანის სამედიცინო ინსტიტუტი. ონკოლოგიის სპეციალობით დაცული აქვს საკანდიდატო და სადოქტორო დისერტაცია. მან შექმნა და ამჟამად ხელმძღვანელობს აზერბაიჯანის ონკოლოგიის სამეცნიერო სკოლას. იგი ასევე არის აზებაიჯანის ნაციონალური აკადემიის და რუსეთის ფედერაციის სამედიცინო მეცნიერებათა აკადემიის აკადემიკოსი. ასევე ლონდონის უნივერსიტეტის ჰამერსმიტის ჰოსპიტალის საპატიო პროფესორი.
