"დემოკრატიული მოძრაობა-ერთიანი საქართველოს" ლიდერის ნინო ბურჯანაძის მტკიცებით, საქართველოს ხელისუფლების მიერ ჩრდ. კავკასიის თემით სპეკულირება რუსეთის ფედერაციის ხელისუფლების გაღიზიანებას გამოიწვევს და საქართველოს "ხელისუფლების უგუნურმა ქმედებებმა შესაძლოა, საქართველო რუსეთთან სამხედრო კონფლიქტში ჩაითრიოს". ამის შესახებ პარლამენტის ყოფილმა თავმჯდომარემ დღეს, გაზეთ "ტრაიმ ტაიმის" პრეს-კლუბში ისაუბრა.
"საქართველოს ხელისუფლების ჩრდილოეთ კავკასიელებთან დაკავშირებული სახიფათო თამაშები რუსეთის მხრიდან შესაძლოა მათთვის ხელსაყრელ კონტექსტში იქნას გამოყენებული და არსებობს საფრთხე, რომ ჩვენი ხელისუფლების მიერ ჩრდ. კავკასიის თემით სპეკულირებით საქართველო ისეთ პროვოკაციაში აღმოჩნდეს, საიდანც ქვეყანა სრულიად დაშლილი გამოვა", - განაცხადა ბურჯანაძემ.
ნინო ბურჯანაძემ რუსულ პრესაში გასული ირაკლი ოქრუაშვილის განცხადებებიც ახსენა, სადაც თავდაცვის ყოფილი მინისტრი ამტკიცებს, რომ საქართველოში ჩრდ. კავკასიელი ბოევიკების მომზადება მიმდინარეობს. ბურჯანაძემ განმარტა, რომ რუსთის ხელისუფლება ოქრუაშვილის ამ განცხადებებს სათანადო ყურადღებას მიაქცევს, რაც ბურჯანაძის თქმით, მათი მხრიდან ომის დაწყების შანსს ზრდის.
"საქართველოში, რომ ჩეჩენ ბოევიკებს ამზადებენ და შავ ფულს ათეთრებენ ამის შესახებ მინიშნებები მეც გამიკეთებია, თუმცა ამ ეტაპზე ამის დამადასტურებელი მტკიცებულება არ მაქვს", - აღნიშნა ბურჯანაძემ და განმარტა, რომ ქართველმა ხალხმა არსებული საფრთხეების გათვალისწინებით, დღევანდელი ხელისუფლება თავიდან უნდა მოიშოროს.
