რომის პაპი ფრანცისკე ეხმიანება აზერბაიჯანსა და სომხეთს შორის წამოწყებულ საბრძოლო მოქმედებებს და მხარეებს მოლაპარაკებებისკენ მოუწოდებს.
ამის შესახებ რომის პაპმა ვატიკანში, წმინდა პეტრეს მოედანზე ქადაგებისას განაცხადა.
"მე ვლოცულობ კავკასიაში მშვიდობისათვის და ვთხოვ კონფლიქტის მონაწილე მხარეებს, აჩვენონ მაგალითი ძმობისა და კეთილი ნებისა, რამაც შეიძლება მიგვიყვანოს პრობლემების მოგვარებასთან, არა ძალისა და იარაღის გამოყენებით, არამედ დიალოგისა და მოლაპარაკებების გზით", - თქვა პაპმა.
რომის პაპმა მწუხარება გამოთქვა სამხედო დაპირისპირებისას დაღუპულთა გამო და მორწმუნეებს მშვიდობისთვის ლოცვისკენ მოუწოდა.
სომხეთისა და აზერბაიჯანის საზღვარზე ვითარება დღეს დილიდან უკიდურესად დაიძაბა. მხარეები ერთმანეთს სამხედრო თავდასხმაში ადანაშაულებენ.
აზერბაიჯანის თავდაცვის სამინისტრო იუწყება, სომხეთის მხრიდან დღეს დილით ფართომასშტაბიანი შეტევა განხორციელდა.
სომხეთი აცხადებს, რომ აზერბაიჯანმა დაიწყო შეტევა მთიან ყარაბაღზე.
ვრცელდება ინფორმაცია ორივე მხრიდან დაჭრილ და მოკლულ მშვიდობიან მოსახლეობასა და სამხედრო მოსამსახურეებზე.
სომხეთში გამოცხადდა საომარი მდგომარეობა და საყოველთაო მობილიზაცია.
აზერბაიჯანსა და სომხეთს შორის საბრძოლო მოქმედებების განახლებას ეხმიანებიან საქართველოს პრეზიდენტი სალომე ზურაბიშვილი და საგარეო საქმეთა სამინისტრო.
ფოტო: Reuters
