საფრანგეთმა სომხეთის მოქალაქეებისათვის ვიზების მიღების პროცედურა გაამარტივა. როგორც სააგენტო "ჯი-ეიჩ-ენის" კორესპონდენტი ერევნიდან იტყობინება, ეს განცხადება სომხეთის რესპუბლიკაში საფრანგეთის კონსულმა ფრედერიკ გრაპენმა დღეს გამართულ პრესკონფერენციაზე გააკეთა.
კონსულის თქმით, სომხეთის ის მოქალაქეებს, რომლებმაც, სულ მცირე ორი წლის წინ მიიღეს პირველად ეს ვიზა, 1 ნოემბრიდან შეეძლებათ აღარ წარმოადგინონ თავიანთი და თავიანთი შვილების მოწმობები, ასევე მშობლების ქორწინების მოწმობა, განქორწინების მოწმობა, პრივატიზაციის მოწმობა, რადგანაც ეს დოკუმენტები უკვე არის საელჩოში.
მისივე თქმით, ეს დოკუმენტები შესაძლოა საჭირო გახდეს მხოლოდ ოჯახურ ან საზოგადოებრივ ცხოვრებაში ცვლილებების შესვლის შემდეგ.
ამას გარდა, სომხეთის მოქალაქეებს 15 ნოემბრიდან საკონსულო სამსახურში დოკუმენტების შეტანა ინტერნეტით შეეძლებათ.
აღსანიშნავია, რომ სომხეთის რესპუბლიკაში საფრანგეთის კონსულმა ფრედერიკ გრაპენმა ხაზგასმით აღნიშნა, რომ ამიერიდან საკონსულო დოკუმენტაციას რუსულ ენაზე აღარ მიიღებს - მხოლოდ ფრანგულ და ინგლისურ ენებზე. ფრედერიკ გრაპენმა ასევე განაცხადა, რომ მომავალი წლიდან განმცხადებლებს ასევე განემარტებათ ვიზის გაცემაზე უარის თქმის მიზეზი, რასაც ადრე პრაქტიკაში ადგილი არ ჰქონია.
