დღეს და ხვალ თბილისის იუსტიციის სახლთან კორონავირუსზე უფასო ტესტირება ჩატარდება. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ, მთავრობის ადმინისტრაციაში გამართულ ბრიფინგზე განაცხადა.
გამყრელიძის თქმით, კვლევაში მონაწილეობა ნებისმიერ მსურველს შეეძლება.
მისივე თქმით, იგეგმება 1000-მდე ნიმუშის აღება, რათა დადგინდეს რა ინტენსივობით ცირკულირებს ვირუსი ქვეყანაში.
"გვინდა, თბილისში გავზომოთ ინფექციის ცირკულირების ინტენსივობა და მოგიწოდებთ, იუსტიციის სახლის უკანა მხარეს არის მოწყობილი შესაბამისი სივრცე, დღეს, ხვალ იქნებიან ნიმუშის ამღებები და ვისაც გსურთ, შეგიძლიათ, მიბრძანდეთ, აიღოთ ნიმუში და მეორე დღეს პასუხი გექნებათ. გვაინტერესებს, დაახლოებით 1000 ადამიანზე როგორია ინფექციის გავრცელების ინტენსივობა. ეს კვლევები არის საშუალება, გეჭიროს ხელი პულსზე, რა ინტენსივობით ცირკულირებს ინფექცია", – განაცხადა გამყრელიძემ.