გამოიცა პირველი ტომი საქართველოს ტექნიკურ უნივერსიტეტში მიმდინარე პოლიტიკის იმიტირებული სამსჯავროს მასალებისა "პოლიტიკა და ეროვნული ინტერესები".
მსოფლიოში პირველად იმიტირებული სასამართლო პროცესი გამოყენებულია არა სისხლის სამართლისა და სამოქალაქო საქმეების განსახილველად, არამედ ეროვნული ინტერესების კონტექსტში პოლიტიკისათვის განაჩენის გამოსატანად და, ამავე დროს, ამაში სტუდენტების (უფროსკლასელების) ჩადებული შრომის ხარისხის შესაფასებლად. საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტზე (დეკანი, პროფ. ირაკლი გაბისონია) მოიძებნა და დაინერგა სტუდენტების სასწავლო-სამეცნიერო პროცესში ინტერესითა და ხალისით ჩაბმის, მათი ცოდნისა და უნარ-ჩვევების გადმოცემისა და შეფასების საიტერესო, თვალსაჩინო და ეფექტური საშუალება.
ეს გამოიხატა სასწავლო-სამეცნიერო პროექტის "პოლიტიკა სამსჯავროზე" (ავტორი პროფ. ჰენრი კუპრაშ-ვილი) განხორციელებით სხვადასხვა, საფა¬კულტეტო, უნივერსიტეტშორისი, უცხოენოვან და სასკოლო ფორმატ¬ში. პროექტი მასმედიის მიერ შემკობილ იქნა სხვადასხვა ეპითეტით: საუკუნის პროექტი, გამარჯვებისათვის დაბადებული პროექტი და სხვ.
სტუდენტები (უფროსკლასელები) სწავლობენ და იკვლევენ ცნობილი პოლიტიკური პირების (პოლიტიკური პარტიების) მიერ გატარებული პოლიტიკის შესაბამისობას ქვეყნის ეროვნულ ინტერესებთან და შედეგები სამსჯავროზე განსასჯელად გამოაქვთ ბრალდებისა და დაცვის გუნდებს. მათ უყალიბდებათ პოლიტიკის პრობლემების მეცნიერული შესწავლის, კვლევისა და ანალიზის, წყაროების მოძიების, კრიტიკული აზროვნების, ქცევისა და ურთიერთობის ეთიკის, გუნდური მუშაობის, საჯარო გამოსვლისა და დებატებში მონაწილეობის უნარ-ჩვევები. ამასთან, სხვადასხვა სპეციალობების ჰარმონიული ურთიერთკვეთის, თეორიულ-პრაქტიკული სინთეზისა და უნივერსალიზაციის შედეგები ხელს უწყობს მრავალმხრივად განვითარებული, მაღალი დონის სპეციალისტის მომზადებას.
სტუდენტებმა (უფროსკლასელებმა) მოიძიეს მრავალი საინტერესო მასალა, რის საფუძველზეც, ხშირ შემთხვევაში, მოხდა საქართველოს პოლიტიკის ისტორიიდან მნიშვნელოვანი პერიოდების ახლებური პოლიტიკური გააზრება და დამკვიდრებული ძველი სტერეოტიპების მსხვრევა, ეროვნული ინტერესების, სტრატეგიის, სისტემური მართვის, პოლიტიკის სტრუქტურულ-ფუნქციური კანონზომიერებების ურთიერთკავშირის სიღრმისეული გაცნობიერება.
პროექტი, მისი მიზნები და ამოცანები სრულიად აპოლიტიკურია და გამორიცხავს მიმდინარე პოლიტიკურ-პარტიულ პროცესებთან პიროვნული თუ ორგანიზაციული სახით რაიმე შეხებას.
ამ ეტაპზე, უკვე დაგროვდა განვლილი 2 სეზონის 21 ტომის მასალა და დაიწყო მათი გამოცემა, რომელთაც ეტაპობრივად დაემატება შემდგომ სეზონებში ჩატარებული სამსჯავროების მასალები.
წიგნი გამორჩეულია სასარგებლო ინფორმაციის სიუხვით, რაზეც მისი სარჩევი მეტყველებს: იმიტირებული სამსჯავროს თავმჯდომარის სიტყვა და ნაფიც მსაჯულთა (საგამოცდო კოლეგიის) შემადგენლობა, მომხსენებლის სიტყვა, სხდომის მდივნის მიერ მხარეთა წარდგინება, ბრალდების მხარის, გუნდ ,,თემიდას ხევისბერის“ შესავალი სიტყვა, დაცვის მხარის, გუნდ ,,თემიდას შვიდეულის“ შესავალი სიტყვა, ბრალდების მხარის, გუნდ ,,თემიდას ხევისბერის“ შეკითხვები და დაცვის მხარის, გუნდ ,,თემიდას შვიდეულის“ პასუხები (პაექრობა), დაცვის მხარის, გუნდ ,,თემიდას შვიდეულის“ შეკითხვები და ბრალდების მხარის, გუნდ ,,თემიდას ხევისბერის“ პასუხები (პაექრობა), ბრალდების მხარის, გუნდ ,,თემიდას ხევისბერის“ დასკვნით სიტყვა, დაცვის მხარის, გუნდ ,,თემიდას შვიდეულის“ დასკვნითი სიტყვა, ბრალდების მხარის რეპლიკა, დაცვის მხარის რეპლიკა, მენტორების სიტყვა გუნდების დასახასიათებლად, ბრალდების მხარის, გუნდ ,,თემიდას ხევისბერის“ მტკიცებულებები, შეკერილი საქმეები (ფოტოასლები), დაცვის მხარის, გუნდ ,,თემიდას შვიდეულის“ მტკიცებულებები, შეკერილი საქმეები (ფოტოასლები), ვერდიქტი.
წიგნს დანართის სახით ერთვის: პროექტის „პოლიტიკა სამსჯავროზე“ დებულება, შეფასების კრიტერიუმები, ნაფიც მსაჯულთა კოლეგია (საგამოცდო კოლეგია), მისი შემადგენლობა და მუშაობის წესი, იმიტირებული სამსჯავროს სხდომის ოქმი, პირველი სამსჯავროს ვიდეოკოლაჟის ფოტოები, პირველი სამსჯავრო მასმედიაში და 133 პირის საკუთარ სახელთა საძიებელი.
ასევე, წიგნში შეიძლება გაეცნოთ ცნობილი მეცნიერებისა და პოლიტიკოსების მიერ პროექტის შესახებ გამოთქმულ შეფასებებს.