დარწმუნებულები ვართ, რომ დროული და ადეკვატური გადაწყვეტილებების შედეგად, სიტუაცია ისეთივე მართვადი გახდება, როგორც აქამდე გვქონდა, - აცხადებს თბილისის ინფექციური საავადმყოფოს სამედიცინო დირექტორი მარინა ეზუგბაია.
მისი განმარტებით, ძალიან აქტიური მუშაობა მიმდინარეობს მთავრობასთან, სამედიცინო სექტორს მთავრობასთან საათობრივი ურთიერთობა აქვს.
"შესაბამისად, დარწმუნებულები ვართ, რომ დროული, ადეკვატური გადაწყვეტილებების შედეგად, სიტუაცია ისეთივე მართვადი და კონტროლირებადი გახდება, როგორც აქამდე გვქონდა.
ქვეყანაში ჩატარებული ტესტების რაოდენობა ზუსტად იმის მაჩვენებელია, რომ ინფიცირებული ადამიანების გამოვლენის მაჩვენებელი მაღალია. ეს კარგია იმ თვალსაზრისით, რომ მათი იზოლაცია ხდება და ამის შედეგად, გავრცელების მაქსიმალური პრევენცია ხდება. რაც მეტი გამოვლენილი კონტაქტი იქნება, მით ნაკლებია დაავადების გავრცელების საშიშროება. რიცხვი 158 ნუ შეგვაშინებს, მაგრამ ეს არ ნიშნავს, რომ რეგულაციები არ დავიცვათ. პირიქით, ეს რიცხვი გვეუბნება, რომ მთელმა მოსახლეობამ საკუთარი თავის მიმართ რეგულაციები უნდა გავამკაცროთ“, – განაცხადა მარინა ეზუგბაიამ.
