პედაგოგთა დაზღვევის საკითხს მომავალი წლიდან ჯანდაცვის სამინისტრო გაუწევს კურირებას. ამის შესახებ ცნობილი საფინანსო საბიუჯეტო კომიტეტის 2011 წლის ბიუჯეტის განხილვისას გახდა.
პედაგოგთა დაზღვევის საკითხი პედაგოგთა პროფკავშირის წარმომადგენელმა დენის დავითაშვილმა წამოჭრა. როგორც მან აღნიშნა, პედაგოგთა დაზღვევის საკითხში არსებობს ორი პრობლემა.
"ერთი ის, რომ პროფესიული განათლების პედაგოგთა დაზღვევის საკითხი ისევ არ არის გათვალისწინებული, მაშინ, როდესაც არსებობდა ხელისუფლების დაპირება, რომ მოხდებოდა ამ კატეგორიის პედაგოგთა დაზღვევაც. მეორე პრობელმას კი წარმოადგენს ის, რომ პედაგოგთა დაზღვევის დაფინანსება იქნება არა 100 პროცენტი არამედ 67 პროცენტი, რაც გარკვეულ პრობლემებს შექმნის", _ განაცხადა მან.
თუმცა როგორც სხდომის შემდეგ საფინანსო საბიუჯეტო კომიტეტის თავმჯდომარემ ზურაბ მელიქიშვილმა "ჯი-ეიჩ-ენთან" საუბრისას განმარტა, პედაგოგთა დაზღვევა მომავალი წლიდან გადადის ჯანდაცვის სამინისტროში, რათა ყველა კატეგორიის დაზღვევა ხდებოდეს ერთი სისტემის მიერ. თავად ჯანდაცვის სამინისტროს დაფინანსების საკითხი კი ამ ეტაპზე ისევ გაურკვეველია და შესაბამისად დაზუსტებული ინფორმაცია, თუ როგორი იქნება პედაგოგთა დაზღვევა, არ არსებობს.