არაქართულენოვან მოსახლეობებში ქართული ენის სწავლების პროგრამა არ გაუქმდება. ამის შესახებ განცხადება ფინანსთა მინისტრმა კახა ბაინდურაშვილმა საფინანსო საბიჯეტო კომიტეტის სხდომაზე 2011 წლის ბიუჯეტის პროექტის განხილვისას გააკეთა.
მთავრობის მიერ წარმოდგენილ პროექტში აღნიშნული პროგრამა, რომელსაც ცალკე კოდი ჰქონდა, განულებულია. ამიტომ საზოგადოებაში გაჩნდა ეჭვი, რომ პროგრამა უქმდება. მთავრობის ეს გადაწყვეტილება ოპოზიციამ გააკრიტიკა, თუმცა ბაინდურაშვილი აცხადებს, რომ ოპოზიციის განცხადებები სიმართლეს არ შეესაბამება და მათ შეცდომა მოუვიდათ.
ფინანსთა მინისტრის განმარტებით, აღნიშნული კოდი იმიტომ არის განულებული, რომ ამ პროგრამის დაფინანსება არის დაშლილი ორ ნაწილად და სხვა სექტორშია გადატანილი. ბაინდურაშვილის თქმით, ცალკე დაფინანსდება პროგრამების შემუშავება, რომელიც გაწერილია განათლების სამინისტროს პროგრამების ფარგლებში და ცალკე დაფინანსდება თავად სწავლების პროცესი.
