ბათუმში, მარუხის ქუჩაზე ახალი სამსართულიანი კორპუსი პირდაპირ ტროტუარზეა აშენებული.

აჭარის საზოგადოებრივი მაუწყებლის მიერ გავრცელებულ ფოტოებში ჩანს, რომ სახლმა გზის სავალი ნაწილი ჩახერგა.

ბათუმის მერიამ მოგვიანებით აღნიშნულ სახლთან დაკავშირებით განცხადება გაავრცელა.

"2019 წელს აღნიშნული მიწის ნაკვეთის მესაკუთრემ, მშენებლობის ნებართვის მიღების მიზნით, ბათუმის მერიის არქიტექტურისა და ურბანული განვითარების სამსახურს მიმართა. განმცხადებელს უარი ეთქვა სივრცით-მოცულობითი თვალსაზრისიდან გამომდინარე, ვინაიდან სამშენებლო ტერიტორია მოიცავდა საავტომობილო გზის ნაწილსაც. აღნიშნულ მონაკვეთში კი მშენებლობის წარმოება ჩაითვალა მიუღებლად.

დისციპლინური წარმოება დაიწყო მუნიციპალიტეტის იმ თანამშრომლებთან მიმართებაში, რომელთაც, თავიანთი კომპეტენციის ფარგლებში, უშუალოდ ევალებოდათ ფაქტზე რეაგირება", - ვკითხულობთ განცხადებაში.

სახლის მეპატრონა აცხადებს, რომ შენობა მამაპაპისეულ მიწის ნაკვეთზე ააშენა და მის დემონტაჟს არ აპირებს.