ევროკავშირი ბელარუსის ხელისუფლების 31 წარმომადგენელს, მათ შორის შინაგან საქმეთა მინისტრის სანქციებს უწესებს. ინფორმაციას საერთაშორისო სააგენტო Reuters-ი დიმპლომატიურ წყაროებზე დაყრდნობით ავრცელებს.
წყაროს ინფორმაციით, სანქცირებულთა სიაში ამ დროისთვის არ არის ბელარუსის მოქმედი პრეზიდენტი ალიაქსანდრ ლუკაშენკა, თუმცა, შესაძლოა, სიის ოფიციალურად გასაჯაროებამდე, მისი შემადგენლობა დაზუსტდეს.
ევროკავშირის მიერ დაწესებული სანქციები მოიცავს საბანკო ანგარიშების გაყინვასა და ევროკავშირის ტერიტორიაზე შესვლის აკრძალვას.
როგორც იუწყებიან, სანქცირებულთა სიაში მოხვდა ასევე ბელარუსის ცენტრალური საარჩევნო კომისიის ხელმძღვანელი, შინაგან საქმეთა მინისტრის მოადგილე, იუსტიციისა და უშიშროების სამინიტროების მაღალჩინოსნები.
სანქცირებულთა სიაზე ფორმალური შეთანხმება 21 სექტემბერს, ბრიუსელში, ევროკავშირის საგარეო საქმეთა მინისტრების სხდომაზე უნდა შედგეს. ოფიციალური სია კი 22 სექტემბერს გამოქვეყნდება.
მანამდე იუწყებოდნენ, რომ სანქცირებულთა სიაში, გერმანიის ინიციატივით, არ მოხვდებოდა ალიაქსანდრ ლუკაშენკა, რადგან ანგელა მერკელს სურს დიალოგისთვის შესაძლებლობები დაიტოვოს.
ანტისამთავრობო საპროტესტო მღელვარება ბელარუსში 9 აგვისტოს გამართული საპრეზიდენტო არჩევნების შედეგების გამოცხადების შემდეგ დაიწყო.
გამარჯვებულად გამოცხადდა ქვეყნის ამჟამინდელი მეთაური, ლუკაშენკა. ოპოზიციამ არ ცნო არჩევნების შედეგები, რადგან ისინი გაყალბებულად მიიჩნია. არჩევნების შედეგები არ ცნო შეერთებულმა შტატებმა, ევროკავშირმა და დანარჩენმა თავისუფალმა სამყარომ.
ფოტო: Reuters