რუსეთის ეკლესიის სინოდმა სრულიად ბელარუსის საპატრიარქო ეგზარქოსი, მინკსის მიტროპოლიტი პაველ პონომარიოვი გადააყენა. ინფორმაციას მოსკოვის საპატრიარქოზე დაყრდნობით "ინტერფაქსი" ავრცელებს.
მოსკოვის საპატრიარქო იუწყება, რომ მიტროპოლიტმა თავად ითხოვა ჩამოშორებოდა საეგზარქოსო მოვალეობას და ამ შუამდგომლობით რუსეთის სინოდს მიმართა.
მიტროპოლიტი პაველის ნაცვლად ბელარუსის საპატრიარქო ეგზარქოსად სინოდმა ბორისოვსკისა და მარინოგორსკის ეპისკოპოსი ვენიამინი გამოარჩია. თავად პაველი კი ყუბანის მიტროპოლიტად იქნა გადაყვანილი.
მოსკოვის საპატრიარქოში სინოდის სხდომა დღეს, 25 აგვისტოს გაიმართა.
მიტროპოლიტ პაველის ეკლესიის მმართველობიდან ჩამოშორება შესაძლოა უკავშირდებოდეს მის მიერ ლუკაშენკას საპრეზიდენტო არჩევნებში გამარჯვების მილოცვისთვის ბოდიშის მოხდას. ასევე, მიტროპოლიტმა მოინახულა სპეცრაზმის მიერ ნაცემი და დაშავებული მომიტინგეები.
10 აგვისტოს მიტროპოლიტმა მიულოცა ლუკაშენკას საპრეზიდენტო არჩევნებში გამარჯვება, მოგვიანებით კი, როდესაც შეიტყო მომიტინგეების მიმართ განხორციელებული ძალადობის შესახებ, ნაჩქარევი მილოცვის გამო წუხილი გამოთქვა და ბოდიში მოიხადა.
შეგახსენებთ, ბელარუსის მართლმადიდებელი ეკლესია მოსკოვის საპატრიარქოს დაქვემდებარებაშია.