"ნივეას", "ჩისტაია ლინიასა" და "ინჯოის" პარფიუმერიულ-კოსმეტიკური ნაწარმში ტყვია აღმოჩნდა, - ინფორმაციას momxmarebeli.ge აქვეყნებს.
momxmarebeli.ge-მ თბილისის სხვადასხვა მაღაზიაში შეიძნა 42 დასახელების პარფიუმერიულ-კოსმეტიკური ნაწარმი და პარაბენების, ტყვიისა და დარიშხნის შემცველობაზე შესამოწმებლად გერმანიის ლაბორატორია „ევროფინსში“ გააგავნა.
3 ნიმუშში მცირე ოდენობით ტყვია აღმოჩნდა, ხოლო 3 ნიმუშზე ეტიკეტირების წესები იყო დარღვეული - პროდუქტები შეიცავდა პარაბენებს ნორმის ფარგლებში, მაგრამ ეს ეტიკეტზე არ იყო აღნიშნული.
რაც შეეხება ტყვიის ნაწარმს, რომელშიც ტყვიის შემცველობა აღმოჩნდა, ესენია: ფიტო დეოდორანტი "ჩისტაია ლინია", შხაპის გელი "ნივეა სპა" და კრემ-დეოდორანტი "ინჯოი".
"ნიმუშების სახეობებისა და ჩასატარებელი კვლევების შერჩევა მოხდა მსოფლიოში ამჟამად გავრცელებული საფრთხეების მიხედვით. შესყიდულ იქნა სხვადასხვა ქვეყანაში, სხვადასხვა ფირმის მიერ წარმოებული პროდუქცია, რომელიც ხელმისაწვდომია საქართველოს რიგითი მოქალაქეებისათვის, ესენი იყო: შამპუნები, შხაპის გელები, ბალზამები, ანტიპერსპირანტები და სხვა.
"ევროკავშირში და მსოფლიოს მრავალ სხვა ქვეყანაში მომხმარებელთა ჯანმრთელობის დასაცავად პარფიუმერიულ-კოსმეტიკურ ნაწარმში პარაბენების ნაწილის გამოყენება საერთოდ აკრძალულია, ნაწილი კი - ნორმირებული. ასევე, ამ ტიპის პროდუქციაში დაუშვებელია ტყვიისა და დარიშხნის არსებობა. თუმცა, ვინაიდან ეს ნივთიერებები ბუნებრივ გარემოში გვხდება, მათ შეიძლება შეიცავდეს პარფიუმერიულ-კოსმეტიკური ნაწარმის ნედლეული, ჭურჭელი, რომელშიც ეს პროდუქციაა განთავსებული, ან ისინი პროდუქციაში საწარმოო პროცესის დროს მოხვდეს. ამიტომ ევროკავშირში დაშვებულია ტყვიისა და დარიშხნის ნარჩენების არსებობა პარფუმერიულ-კოსმეტიკურ ნაწარმში იმ შემთხვევებში, როცა ამის თავიდან აცილება ტექნიკურად შეუძლებელია. ეს კი ქვეყანაში მოქმედმა სახელმწიფო მაკონტროლებელმა ორგანომ უნდა გადაწყვიტოს", - წერია momxmarebeli.ge-ის მიერ გამოქვეყნებულ ინფორმაციაში.
