ბელარუსის მოქმედი პრეზიდენტი ალიაქსანდრ ლუკაშენკა მინსკში თავის რეზიდენციასთან, დამოუკიდებლობის სასახლესთან ავტომატით ხელში გამოჩნდა.
გავრცელებულ ვიდეომასალაში ჩანს, რეზიდენციის ტერიტორიაზე ჯავშანჟილეტით შემოსილი ლუკაშენკა ვერტმფრენით მიიყვანეს, შემდეგ კი დაცვის თანხლებით და ავტომატით ხელში შენობისკენ მიემართება.
ბელარუსის დედაქალაქ მინსკში მიმდინარეობს მრავალათასიანი საპროტესტო აქცია "მარში ახალი ბელარუსისთვის".
ოპოზიციის მიერ ორგანიზებულ საპროტესტო მსვლელობაში, რომელიც თავს იყრის მინსკის ცენტრალურ ნაწილში, დამოუკიდებლობის მოედანზე, დაახლოებით 100 ათასზე მეტი ადამიანი იმყოფება.
მომინტინგეები, რომელთაც ხელთ უპყრიათ ბელარუსის ძველი დროშა, წითელი და თეთრი ფერებით, სკანდირებენ "წადი!".
საპროტესტო აქციის მონაწილეებმა მსვლელობის დასაწყისში წუთიერი დუმილით პატივი მიაგეს აქციების დროს სამართალდამცავთა ხელით მოკლულთა ხსოვნას.
დაახლოებით ორი კვირაა ბელარუსში გრძელდება მასობრივი პროტესტი საპრეზიდენტო არჩევნების შედეგების წინააღმდეგ, რომელშიც გამარჯვებული გამოცხადდა ამჟამინდელი სახელმწიფოს მეთაური ალიაქსანდრ ლუკაშენკა, რომელიც ამ თანამდებობას 1994 წლიდან იკავებს.
არჩევნები 9 აგვისტოს გაიმართა. ცესკოს მიერ დამტკიცებული შედეგების თანახმად, ამომრჩეველთა 80.1% -მა ხმა მისცა ლუკაშენკას, 10.12% - მის მთავარ მოწინააღმდეგეს სვიატლანა ციხანოუსკაიას.
