პოლიტიკური პლატფორმის "სტრატეგია აღმაშენებლის" ლიდერი გიორგი ვაშაძე "ნაციონალურ მოძრაობაში" მიმდინარე დისკუსიას ეხმიანება, რომელიც მიხედვითაც, შესაძლოა, ისნის მაჟორიტარულ ოლქში ენმ-მ ვაშაძეს კონკურენტი კანდიდატი დაუყენოს.
"როცა დიდი საქმეების კეთებაზე გვაქვს ამბიცია, უნდა გვესმოდეს, საერთო ოპოზიციური კანდიდატები, საერთო ოპოზიციური კოორდინაცია საერთო გამარჯვებისთვის გვჭირდება და თუ ვინმე ამ შეთანხმებას ერთი მანდატით მეტის მიღების ცდუნების გამო არ უფრთხილდება, ეს ნიშნავს, რომ სამწუხაროდ, ამ რვა წელმა ვერაფერი გვასწავლა.
ნათქვამია, განგება ვინმეს ჩამოშორებას რომ გადაწყვეტს, ჯერ ჭკუას გამოაცლისო. გულწრფელად არ მინდა, ეს გამოთქმა გამართლდეს ზოგიერთ ჩემი კოლეგისა და პარტნიორის მიმართ.
და ბოლოს, მინდა იცოდეს ყველამ, სადაც გიორგი ვაშაძეა და "სტრატეგია აღმაშენებლის" გუნდია, იქ ვერასდროს ნახავთ, რამე ვთქვით და არ შევასრულეთ. სიტყვის კაცობა ცხოვრების უპირველესი პრინციპია ჩვენთვის!
მე და ჩემი გუნდი საერთო გამარჯვებისთვის ვიბრძვით! თქვენ ვისთვის და რისთვის?", - აღნიშნავს გიორგი ვაშაძე.
