"ნაციონალურ მოძრაობას" არამცთუ აგური, არამედ კენჭიც არ დაუდია ბავშვთა უფლებების დასაცავად. ამის შესახებ საქართველოს იუსტიციის მინისტრმა, თეა წულუკიანმა ჟურნალისტებთან საუბრისას განაცხადა.
თეა წულუკიანის თქმით, "ქართული ოცნების" ინიცირებული, 18 წლამდე ასაკის ბავშვებისთვის 200-ლარიანი დახმარების გაცემის პროგრამით "ნაციონალური მოძრაობა" პოლიტიკური ქულების დაწერას ცდილობს.
"ნაციონალურმა მოძრაობამ“ და მისმა დანაყოფებმა, არ გაგვახსენოთ ეს დროო, მაგრამ მთლიანად, ამ გაერთიანებულ „ნაციონალურ მოძრაობას“, რომელიც დღეს უკვე არაერთი პარტიისგან შედგება, ყოველთვის შევახსენებ, რომ არც ერთი არამცთუ აგური, არამედ კენჭიც არ დაუდიათ ბავშვთა უფლებების დასაცავად. ისინი პირდაპირ იყვნენ დაკავებულები ბავშვების მომავლის ნგრევით. ამისათვის საკმარისია გავიხსენოთ ბავშვთა მდგომარეობა ყველა სფეროში და თუნდაც სისხლის სამართლის პროცესში.
ჩვენ ვგმობთ იმას, რომ დღეს „ქართული ოცნების“ ხელისუფლების და პრემიერ-მინისტრის ინიციატივით განხორციელებული ეს დახმარების პროექტი მათთვის ინსტრუმენტია. ცდილობენ, თავად დაიწერონ პოლიტიკური ქულები. ეს მათი მორალური სახეა, მაგრამ ჩვენ ყველაფერს ვაკეთებთ იმისთვის, რომ 800 000 ბავშვი, მათი მშობლები მალე დარეგისტრირდნენ. თქვენ ნახეთ, რომ 600 000-ს უკვე გასცდა რეგისტრირებულთა რიცხვი", - განაცხადა წულუკიანმა.
შეგახსენებთ, დღეს, "ქართული ოცნების" ლიდერებმა განაცხადეს, რომ "ნაციონალური მოძრაობის" წარმომადგენლები მოსახლეობას რეგისტრაციაში დახმარებას სთავაზობენ და ამით პოლიტიკურ ქულებს იწერენ.
