პერევის დასახლებული პუნქტიდან რუსული სასაზღვრო საგუშაგოს გაყვანით ჩვენს მიერ "მედვედევი-სარკოზის" გეგმის საეჭვოდ შესრულების საკითხი საბოლოოდ დახურულია. ნათქვამია რუსეთის საგარეო საქმეთა სამინისტროს მიერ გავრცელებულ განცხადებაში, რომელიც პერევიდან რუსი ოკუპანტების გაყვანას ეხება.
სერგეი ლავროვის უწყება პერევიდან რუსი ოკუპანტების გასვლას "კეთილი ნების მოქმედებას" უწოდებს.
"კეთილი ნების მოქმედებით, რუსულმა მხარემ სოფელ პერევში ორი წლის განმავლობაში სადავო ტერიტორიაზე მდებარე საგუშაგო სამხრეთ ოსეთის ტერიტორიის სიღრმეში გადაანაცვლა.
ყოველივე ამას სერიოზული მომზადება უძღვოდა წინ. რუსეთის ფედერალური სამსახურის სასაზღვრო სამსახურის ხაზით ძნელად მისადგომ სამთო ადგილას განხორციელდა 10 კილომეტრზე მეტი მანძილის შემოვლითი გზის მშენებლობა, რომელიც ქარძმანის ხეობას სამხრეთ ოსეთის დანარჩენ ტერიტორიასთან აერთებს. ეს ადგილობრივი ოსური მოსახლეობის ურთიერთობისათვის მნიშვნელოვანია", _ ნათქვამია რუსეთის საგარეო საქმეთა სამინისტროს მიერ გავრცელებულ განცხადებაში.
მათივე განცხადების მიხედვით, რუსულმა მხარემ პერევიდან ჯარის გაყვანის სანაცვლოდ ევროკავშირის მისიას თბილისთან "აღმზრდელობითი" სამუშაოს ჩატარება დაავალა.
"ჩვენი მესაზღვრეების გადაადგილების ძირითადი პარამეტრები საქართველოში ევროკავშირის მისიის წარმომადგენლებთან ადრევე განვიხილეთ. ჩვენ დავადასტურეთ, რომ მზად ვართ დღის წესრიგიდან მოვხსნათ ეს ბოლო დროს დასავლელი პარტნიორების მიერ მრავალჯერ წინ წამოწეული ტექნიკური პრობლემა, იმ პირობით, რომ ევროკავშირის მისიის წარმომადგენლები საზღვრის ქართული მხრიდან მკაფიო უსაფრთხოების გარანტიებს მოგვცემდნენ და შესაძლო პროვოკაციების თავიდან აცილების მიზნით თბილისთან "აღმზრდელობით" სამუშაოებს ჩაატარებდნენ", _ ნათქვამია განცხადებაში და იქვე აღნიშნულია, რომ "მნიშვნელოვანი იყო, თავიდან აგვეცილებინა 2008 წლის დეკემბრის მოვლენები, როდესაც რუსული საგუშაგოს კეთილი ნებით გასვლის პირველი მცდელობა წარუმატებლად დასრულდა, ვინაიდან რუსი სამხედროების გასვლის შემდეგ, პერევი დაუყოვნებლივ დაიკავეს საქართველოს შს სამინისტროს სპეცდანიშნულების მსხვილმა ძალებმა, ქართულმა პროპაგანდამ კი ყოველივე ეს თავის "მსხვილ გამარჯვებად" გაყიდა. მაშინ ქარძმანის ხეობაში მაცხოვრებელი სამხრეთ ოსეთელებისათვის რეალურ საფრთხე გაჩნდა და ამიტომაც ჩვენი მესაზღვრეები იძულებულნი გახდნენ პერევში დაბრუნებულიყვნენ".
მათივე განცხადების მიხედვით, ყველა აუცილებელი დარწმუნება ევროკავშირის მხრიდან რუსულმა მხარემ მიიღო.
"ამჯერად, რუსული საგუშაგოს გასვლა ევროკავშირის მისიის დამკვირვებელთა იქ ყოფნის ფონზე მიმდინარეობს. რაიმე სახის შეფერხებას ქართული პოლიციის არც თუ ისე დიდი დანაყოფის მხრიდან ადგილი არ ჰქონია. პერევში არსებულ სიტუაციაზე კონტროლს თავისი დამკვირვებლების მეშვეობით ევროკავშირის მისია უზრუნველყოფს, სულ მცირე რამდენიმე კვირის განმავლობაში სიტუაციის სრულ სტაბილიზაციამდე", _ ნათქვამია განცხადებაში.
ამას გარდა, იქვე აღნიშნულია, რომ რუსული მხარე იმედს იტოვებს, რომ პერევიდან ოკუპანტთა გასვლა "ადეკვატურ და კონსტრუქციულ რეაქციას მიიღებს ქართული და საერთაშორისო საზოგადოების მხრიდან".
"იმედს ვიტოვებთ, რომ რუსული მხარის მიერ გადადგმული ეს ნაბიჯი, რომელიც მიმართულია საქართველოსა და სამხრეთ ოსეთის საზღვარზე არსებული დაძაბულობის განსამუხტავად ადეკვატურ და კონსტრუქციულ რეაქციას მიიღებს ქართული და საერთაშორისო საზოგადოების მხრიდან.
პერევის დასახლებული პუნქტიდან რუსული სასაზღვრო საგუშაგოს გაყვანით ჩვენს მიერ "მედვედევი-სარკოზის" გეგმის საეჭვოდ შესრულების საკითხი საბოლოოდ დახურულია. რესპუბლიკების სამხრეთ ოსეთისა და აფხაზეთის საზღვრებს საიმედოდ იცავენ რუსი მესაზღვრეები ამ სახელმწიფოებთან გაფორმებული ხელშეკრულების საფუძველზე", _ ნათქვამია განცხადების დასასრულს.