ლიეტუვის ყოფილი პრეზიდენტი დალია გრიბაუსკაიტე ბელარუსში მიმდინარე მოვლენებს ეხმიანება და ალექსანდრ ლუკაშენკოს გადადგომისკენ მოუწოდებს. ამის შესახებ გრიბაუსკაიტე მიკრობლოგ "ტვიტერზე" წერს.
"დიქტატორო, სისხლიანი ხელებით, წადი ახლავე. შენი ბედი შენვე განსაზღვრე - ბელარუსის მიწაზე მომავალი არ გაქვს", - დაწერა დალია გრიბაუსკაიტემ.
მინსკსა და ბელარუსის სხვა ქალაქებში მეოთხე დღეა საპროტესტო აქციები არ წყდება. გასული სამი ღამის განმავლობაში მომხდარი შეტაკებების შედეგად საავადმყოფოებში 200-ზე მეტი ადამიანი მოხვდა, 7 ათასამდე პირი კი დაკავებულია.
საპროტესტო აქციის მონაწილეები არ ეთანხმებიან საპრეზიდენტო არჩევნების შედეგებს, რომელზეც ცესკოს წინასარი მონაცემებით, მოქმედმა პრეზიდენტმა ალექსანდრ ლუკაშენკომ ხმათა 80,08 პროცენტი დააგროვა, მისმა პოლიტიკურმა მოწინააღმდეგემ სვეტლანა ციხანოვსკაიამ კი - 10,9 %.
გავრცელებული ცნობით, აქციებზე დაიღუპა ორი ადამიანი.
უფლებადამცველთა ინფორმაციით, მხოლოდ მინსკში, 1000-ზე მეტი ადამიანია დაკავებული. ბელარუსის დედაქალაქში მობილიზებულია ძალოვანი ქვედანაყოფებები. ასევე გადასროლილია ჯავშანმანქანები და ბარიკადების დასაშლელი ტექნიკა.
გუშინ რამდენიმე ქალაქში "ცოცხლი ჯაჭვის" აქცია გაიმართა. ქუჩებში ასობით ქალი ყვავილებით გამოვიდა და ცოცხალი ჯაჭვი შეკრა. მათ ყვავილები მიიტანეს იმ ადგილას, სადაც მილიცია საპროტესტო აქციის მონაწილეებს სასტიკად გაუსწორდა.
