გერმანიის დაავადებათა კონტროლისა და პრევენციის ფედერალური სააგენტოს, რობერტ კოხის ინსტიტუტის პრეზიდენტი, ლოთარ ვილერი აცხადებს, რომ შეშფოთებულია გერმანიში კორონავირუსით ინფიცირების შემთხვევების ზრდით. ამის შესახებ ვილერმა საგანგებო პრესკონფერენციაზე განაცხადა.
ლოთარ ვილერის თქმით, ძალზედ დამწუხრებულია ახალი შემთხვევების რაოდენობით და შესაძლოა, ეს ვირუსის ახალ ტალღასთან იყოს დაკავშირებული.
ბოლო შვიდი დღის განმავლობაში გერმანიაში ინფიცირების 3 611 ახალი შემთხვევა გამოვლინდა.
ვილერის განცხადებით, ივნისის ბოლოსა და ივლისის დასაწყისში დაფიქსირებული შემთხვევების დაბალი რაოდენობა იმის მანიშნებელი იყო, რომ პრევენციული ღონისძიებები და შეზღუდვები კარგად მუშაობდა.
გერმანიის მთავარმა ინფექციონისტმა, კიდევ ერთხელ მოუწოდა თანამოქალაქეებს, რომ განაგრძონ წესების დაცვა, სოციალური დისტანცია, ხელის ხშირი დაბანა და პირბადეების ტარება.
ამავე პრესკონფერენციაზე, რობერტ კოხის ინსტიტუტის კიდევ ერთმა წარმომადგენელმა, უტე რექსორტმა განაცხადა, რომ გერმანიაში არსებული ეპიდემიოლოგიური ვითარება ართულებს ინფექციის ჯაჭვების დადგენას.
ბოლო 24 საათის განმავლობაში, გერმანიაში ვირუსის 633 ახალი შემთხვევა დაფიქსირდა. საერთო ჯამში 206 242 ადამიანს დაუდგინდა ვირუსული ინფექცია. გარდაცვლილია 9 122 ადამიანი.
ფოტო: AFP
