ფინანსთა სამინისტროს საგამოძიებო სამსახურის თანამშრომლებმა გორში მცხოვრები გაიოზ გოჩაშვილი დააკავეს, რომელიც გორის მუნიციპალიტეტის გამგეობასთან ხელშეკრულების საფუძველზე ქალაქის მზრუნველობამოკლებული ადამიანების უფასო კვებას აწარმოებდა.
სასადილოს ფუნქციონირებისათვის საჭირო პროდუქტის შესაძენად გორის მუნიციპალიტეტის გამგეობიდან გოჩაშვილს ყოველწლიურად 49 200 ლარი ერიცხებოდა.
გამოძიებით დადგენილია, რომ გაიოზ გოჩაშვილი პროდუქტის შეძენისას ამზადებდა და შემდგომ გამგეობაში გაზრდილი ხარჯების წარსადგენად იყენებდა ყალბ საგადასახადო დოკუმენტებს, ადგენდა ყალბი შესყიდვის აქტებს, სადაც პროდუქტების მაღალ ფასებს აფიქსირებდა, რეალურად კი - იგი ყიდულობდა ნაკლები ფასისა და რაოდენობის პროდუქტებს, ამცირებდა მზრუნველობამოკლებული ადამიანებისათვის განკუთვნილი საკვების რაოდენობას, უმზადებდა მათ ნორმით გათვალისწინებულზე ნაკლებს და გაყალბებული დოკუმენტებით მიღებულ შემოსავლებს უკანონოდ ითვისებდა.
სამართალდამცველთა მონაცემებით, თითქმის ორი წლის მანძილზე გოჩაშვილმა 18 000 ლარი მიითვისა.
მიმდინარეობს წინასწარი გამოძიება საქართველოს სისხლის სამართლის კოდექსის 210- და 182-ე მუხლებით, რაც ითვალისწინებს თავისუფლების აღკვეთას 7-11 წლამდე ვადით.