შეერთებული შტატები შეშფოთებულია სომხეთ-აზერბაიჯანის საზღვართან დაპირისპირების გამო. ამის შესახებ სახელმწიფო მდივანმა მაიკ პომპეომ ოთხშაბათს გამართულ პრესკონფერენციაზე განაცხადა.
მან მხარეებს, ვითარების დეესკალაციისა და მოლაპარაკებების განახლებისკენ მოუწოდა.
"შეერთებული შტატები ღრმად შეშფოთებულია სომხეთისა და აზერბაიჯანის საზღვარზე დაპირისპირების გამო. სამძიმარს ვუცხადებთ მსხვერპლთა ოჯახებს და მხარეებს მოვუწოდებთ, დაუყოვნებლივ მოახდინონ ვითარების დეესკალაცია, შეწყვიტონ ცეცხლი და განაახლონ მოლაპარაკებები მინსკის ჯგუფის თანათავმჯდომარეობის ფორმატში", - განაცხადა მაიკ პომპეომ.
12 ივლისს დაწყებული შეიარაღებული დაპირისპირება სომხეთ-აზერბაიჯანის საზღვარზე ამ დრომდე გრძელდება.
ბაქოს ინფორმაციით, დაიღუპა 11 აზერბაიჯანელი სამხედრო, მათ შორის გენერალი.
სომხური მხარის განცხადებით, დაღუპულია ორი და დაჭრილია ხუთი სამხედრო. აზერბაიჯანი და სომხეთი ვითარების გამწვავებაში ერთმანეთს ადანაშაულებენ.
ფოტო: სახელმწიფო დეპარტამენტი