საქართველოს პრემიერ-მინისტრი, გიორგი გახარია, საქართველოს მთავრობისა და ქართველი ხალხის სახელით, ევროკავშირს მადლობას უხდის საქართველოს უსაფრთხო ქვეყნად აღიარების გამო. ამის შესახებ პრემიერ-მინისტრი სოციალურ ქსელში წერს.
"დღეს ევროკავშირმა საქართველო იმ 15 ქვეყანას შორის დაასახელა, რომელზეც წევრი სახელმწიფოებისთვის საზღვრების გახსნასთან დაკავშირებით რეკომენდაციას გასცემს.
საქართველოს ე.წ. „მწვანე ქვეყნების“ სიაში შეყვანა არის ევროკავშირთან მჭიდრო პარტნიორობის კიდევ ერთი დასტური, მნიშვნელოვანი მიღწევა და აღიარება იმ წარმატების, რომელიც საქართველოს, ჩვენს ხალხს და ხელისუფლებას აქვს პანდემიასთან ბრძოლის მიმართულებით.
ახლა უკვე, ჩვენ უშუალოდ ევროკავშირის წევრ სახელმწიფოებთან განვაგრძობთ აქტიურ კონსულტაციებს, რათა ევროკავშირის მხრიდან გამოქვეყნებული ამ დოკუმენტის შესაბამისად, კოორდინირებულად, ეტაპობრივად და შეთანხმებულად შევძლოთ მოქალაქეთა უსაფრთხო მიმოსვლის უზრუნველყოფა.
საქართველოს მთავრობის და ქართველი ხალხის სახელით, მადლობას ვუხდი ევროკავშირს აღიარებისთვის, ნდობისთვის და სტრატეგიული პარტნიორობისთვის", - წერს გახარია.
ევროკავშირის საბჭომ ოფიციალურად გამოაქვეყნა იმ ქვეყნების ჩამონათვალი, რომელსაც საზღვრებს 1-ლი ივნისიდან გაუხსნის.
ქვეყნების ჩამონათვალში 15 სახელმწიფო მოხვდა, მათ შორის საქართველო. ეს ქვეყნებია: საქართველო, მონტენეგრო, სერბეთი, კანადა, ურუგვაი, ალჟირი, ტუნისი, მაროკო, რუანდა, ავსტრალია, ახალი ზელანდია, იაპონია, სამხრეთ კორეა, ტაილანდი და ჩინეთი.
ჩინეთის შემთხვევაში, საზღვარი მხოლოდ იმ პირობით გაიხსნება, თუ ჩინეთ თავადაც იგივე გადაწყვეტილებას მიიღებს.