ევროპულმა სახელმწიფოებმა სერიოზულად უნდა იფიქრონ იმ ახალ რეალობაზე, სადაც შეერთებულ შტატებს შესაძლოა აღარ ჰქონდეს გლობალურ ლიდერობაზე პრეტენზია. აღნიშნულთან დაკავშირებით გერმანიის კანცლერმა, ანგელა მერკელმა სხვადასხვა ევროპულ გამოცემასთან ისაუბრა.
"ჩვენ გავიზარდეთ იმ ცოდნით, რომ შეერთებულ შტატებს სურდა ყოფილიყო გლობალური ლიდერი. თუ შეერთებულ შტატებს სურს, რომ ამ როლის შესრულებაზე თავად თქვას უარი, მაშინ ჩვენ ამაზე სერიოზულად უნდა ვიფიქროთ და გავაანალიზოთ", - თქვა ანგელა მერკელმა.
გერმანიის კანცლერის ამ განცხადების ფონია აშშ-ის პრეზიდენტის, დონალდ ტრამპის გადაწყვეტილება, შეამციროს გერმანიაში შეერთებული შტატების სამხედრო წარმომადგენლობა.
მანამდე ტრამპის ეს მოულოდნელი გადაწყვეტილება გააკრიტიკეს გერმანიის თავდაცვისა და საგარეო საქმეთა მინისტრებმა.
ევროპული და ამერიკული მედიის ნაწილი იტყობინება, რომ ტრაპმა სამხედრო კონტიგენტის შემცირების გადაწყვეტილება გერმანიასა და ჩრდილოატლანტიკური ალიანსის წევრ ქვეყნებთან კონსულტაციების გარეშე მიიღო.
ანგელა მერკელი ინტერვიუში აღნიშნულ საკითხსაც შეეხო. მისი თქმით, გერმანიაში ამერიკული სამხედროების ყოფნა აშშ-ის ინტერესებშიც შედის.
"ამერიკელი სამხედროების ყოფნა გერმანიის ტერიტორიაზე ეხმარება არამხოლოდ გერმანიისა და ნატო-ს ევროპული ნაწილი უსაფრთხოებას, არამედ შეერთებული შტატების ინტერესების დაცვასაც. ჩვენ გერმანიაში კარგად ვიცით, რომ თავდაცვაზე უფრო მეტი უნდა დავხარჯოთ. ამ მიმართულებით ბოლო წლებში გარკვეულ პროგრესსაც მივაღწიეთ", - განაცხადა კანცლერმა.
მერკელმა იმედი გამოთქვა, რომ გერმანიასა და შეერთებულ შტატებს შორის თავდაცვის სფეროში არსებული თანამშრომლობა შენარჩუნდება.
