პარლამენტის ადამიანის უფლებათა და სამოქალაო ინტეგრაციის კომიტეტის თავმჯდომარის, სოფო კილაძის განცხადებით "ნაციონალური მოძრაობა" ისე შორსაა ადამიანის უფლებებისგან, როგორც საქართველო და ჩრდილო კორეა.
ამგვარი შეფასებით მიმართა სოფო კილაძემ "ნაციონალური მოძრაობის" წევრს, სალომე სამადაშვილს კომიტეტის სხდომაზე, სადაც სახალო დამცველის 2019 წელს ადამიანის უფლებების მდგომარეობის შესახებ ანგარიშს ისმენდნენ.
"ახლა ქალბატონი სალომე რომ საუბრობდა ადამიანის უფლებებზე, მე მაგალითად, თქვენს ადგილზე ძალიან შემრცხვებოდა ადამიანის უფლებების კომიტეტზე შემოსვლა, რადგან თქვენ და თქვენი პოლიტიკური ძალა ისე შორს ხართ ადამიანის უფლებებისგან, როგორც საქართველო და ჩრდილო კორეა. მგონი, ძალიან კარგი შედარებაა ამ დიდი მანძილის შესაფასებლად", - განაცხადა სოფო კილაძემ.
სოფო კილაძის განცხადებას სალომე სამადაშვილი გამოეხმაურა და განაცხადა, რომ კომიტეტის სხდომის თავმჯდომარეს ამგვარი განცხადებების გაკეთების უფლება არ აქვს.
"ქალბატონო სოფიო, ეს თქვენი უფლებამოსილება არ არის. თქვენ ხართ სხდომის წამყვანი, ეტყობა, არ გესმით. ზოგადად ხომ არაკომპეტენტური ხართ, მათ შორის, ადამიანის უფლებების მიმართულებით, მაგრამ რეგლამენტი მაინც წაიკითხეთ. რეგლამენტი წაიკითხეთ და გაერკვეთ, თქვენი ვალდებულება რა არის, კომიტეტის სხდომა როცა მიგყავთ", - განაცხადა სალომე სამადაშვილმა.
სახალხო დამცველმა პარლამენტის ადამიანის უფლებათა კომიტეტში 2019 წელს ადამიანის უფლებების დაცვის მდგომარეობის შესახებ ანგარიში წარადგინა.
