პოლიტიკური ხარაკირი უნდა გააკეთოთ თქვენ, დიდი ხანია, – ასე მიმართა „პატრიოტთა ალიანსის“ წევრმა, დეპუტატმა ადა მარშანიამ „ნაციონალური მოძრაობის“ წევრს, სალომე სამადაშვილს ადამიანის უფლებათა დაცვის კომიტეტის სხდომაზე.
"პოლიტიკური ხარაკირი უნდა გააკეთოთ, თქვენ დიდი ხანია. აქ მოდიხართ და კიდევ ენას ატლიკინებთ, რასაც ჰქვია, ქალბატონო ვითომ ვაი და ვუი დეპუტატო საქართველოს პარლამენტისა. განსაკუთრებულო, მონა-მორჩილებაში მყოფი სადისტი და კრიმინალი სააკაშვილისა. ძალიან ლამაზი ვარცხნილობა გაქვს დღეს დაყენებული, ეტყობა ემზადებოდით გამოსასვლელად, ამ მგზნებარე სიტყვის სათქმელად. ტელევიზიები დაგესეოდნენ და ამიტომ განსაკუთრებულად მოემზადეთ. მართლა, გულწრფელად გეუბნებით კომპლიმენტს - მაღალი სტანდარტის ვარცხნილობა გაქვთ, მაგრამ მორალური და ზნეობრივი არავითარი უფლება არ გაქვთ, თქვენ გეუბნებით, ადამიანის უფლებებზე აქ ისაუბროთ და პოლიტპატიმრებზე საერთოდ ხმა არ გაქვთ ამოსაღები“, – განაცხადა ადა მარშანიამ.
ადა მარშანიას განცხადება მოჰყვა სალომე სამადაშვილის კითხვებს, რომლითაც მან სახალხო დამცველ ნინო ლომჯარიას მიმართა. კითხვები შეეხებოდა გიორგი რურუას საქმესა და 20 ივნისის მოვლენებს.