ევროკავშირმა შესაძლოა რუსი, ბრაზილიელი და ამერიკელი ტურისტების მიღებაზე უარი თქვას. ინფორმაციას გამოცემა New York Times-ი ავრცელებს.
ევროკავშირის ქვეყნებმა, რომლებიც ჩქარობენ საკუთარი ეკონომიკის განახლებასა და საზღვრების გახსნას, შესაძლოა, უარი თქვან ამერიკელი, ბრაზილიელი და რუსი ვიზიტორების მიღებაზე. აღნიშნული გადაწყვეტილების მიზეზად კი ამ ქვეყნებში კორონავირუსის ეპიდემილოგიური ვითარების სიმწვავეს ასახელებენ.
გამოცემის ინფორმაციით, ევროკავშირი ამზადებს ორ სხვადასხვა სიას იმ ქვეყნებისა, რომელთანაც შესაძლოა გაიხსნას საზღვრები. ორივე სია გამორიცხავს შეერთებულ შტატებსა და სხვა ქვეყნებს, რომლებიც ვირუსის გავრცელების გამო ძალზედ სარისკოდ არიან მიჩნეულნი.
აღნიშნულია, რომ ჯერჯერობით სია მუშავდება და ოფიციალურად არ დამტკიცებულა. მოელიან, რომ ევროკომისია მიმდინარე კვირაში წარმოადგენს იმ ქვეყნების სიას, რომელთანაც რეკომენდებული იქნება საზღვრების გახსნა.