„გამარჯვებული საქართველოს“ ლიდერი, ნინო ბურჯანაძე, 21 ივნისს პარლამენტის მხრიდან საკონსტიტუციო ცვლილებების მხარდაჭერას გამოეხმაურა და განაცხადა, რომ გუშინ პარლამენტმა უახლოეს ისტორიაში უმნიშვნელოვანესი გადაწყვეტილება მიიღო.
ბურჯანაძემ ასევე პოზიტიურად შეაფასა კენჭისყრაში ევროპული საქართველოს მონაწილეობა და თქვა, რომ ქართული ოცნება კვლავ ეძებდა გზებს, რომ საკონსტიტუციო ცვლილებები ჩაეგდო.
„გუშინ ნამდვილად უმნიშვნელოვანესი დღე იყო უახლესი ისტორიის განმავლობაში. საქართველოს მოსახლეობას ძალიან დიდი ბრძოლის შედეგად, რომელიც გაწია ახალგაზრდებმა, საზოგადოების დიდმა ნაწილმა, ოპოზიციურმა პარტიებმა და ჩვენმა საერთაშორისო პარტნიორებმა, დიდი ბრძოლის შედეგად გაუჩნდა შანსი იმისა, რომ ერთხელ და სამუდამოდ საქართველოში მრავალპარტიული არჩევნები ჩატარდეს და პარლამენტი ხალხის ნების გამომხატველი იყო, პროცესები გადავიდეს რუსთაველიდან პარლამენტში და იყოს პოლიტიკურ დებატების კულტურა და არა ერთმანეთის ლანძღვის და ერთმანეთის მუდმივად ჩაძირვის. გუშინ პარლამენტში პირველი მოსმენით საკონსტიტუციო ცვლილების მიღება მართლაც უმნიშვნელოვანესი იყო და კიდევ ერთხელ მინდა მადლობა გადავუხადო ჩვენს დიპლომატებს, საერთაშორისო თანამეგობრობას და ყველა ოპოზიციონერ კოლეგას, რომელიც შეკრებილი იყო ნათელაშვილის ოფისში მაგიდის ირგვლივ. ამ ერთობამ ნამდვილად მოიპოვა ის რისთვისაც ახალგაზრდები და საზოგადოება ამ პერიოდის განმავლობაში იბრძოდა. მინდა ერთმნიშვნელოვნად პოზიტიურად შევაფასო ევროპული საქართველოს მიერ მიღებული ძალიან სწორი და სახელმწიფოებრივი გადაწყვეტილება. ჩემთვის სრულიად ნათელი იყო რომ ქართული ოცნება კვლავ ეძებდა გზებს კანონპროექტის ჩასაგდებად“,-აცხადებს ნინო ბურჯანაძე.
შეგახსენებთ, 21 ივნისს პარლამენტმა პირველი მოსმენით საკონსტიტუციო ცვლილებებს მხარი დაუჭირა. განხილვაში მონაწილეობა არ მიუღია „ერთიან ნაციონალურ მოძრაობას“, „ევროპულმა საქართველომ“ კი კანონპროექტს მხარი დაუჭირა.