ცოტა ხნის წინ, თბილისის საქალაქო სასამართლოში დასრულდა მაგისტრატი მოსამართლის წინაშე ჟურნალისტ გიორგი გაბუნიას გამოკითხვა.
გიორგი გაბუნიას განცხადებით, მას სახელმწიფო დაცვა შესთავაზეს.
"შემომთავაზეს ნებისმიერი სახის დაცვა, რაზეც უნდა მოვილაპარაკო ჩემს ადვოკატთან. უნდა გადავწყვიტოთ ეს საკითხი. მე ჩემი პირადი დაცვა მიცავს. უნდა შევაფასოთ საფრთხეები და დღეს ასე მოხდა, რომ დაცვა შემოგვთავაზეს. თუ გინდა სახელი და გვარიც შეიცვალეო და ყველანაირი დაცვა შემომთავაზეს. მოვილაპარაკებთ ადვოკატთან", - განაცხადა გიორგი გაბუნიამ.
მისივე თქმით, თუ ვინმეს აქვს მისი ლიკვიდაციის სურვილი, ეს შესაძლოა მხოლოდ რუსეთი იყოს.
"ვიცი, და ამაში ეჭვი არ მეპარება, რომ თუ ვინმეს ჩემი ლიკვიდაცია შეიძლება მოუნდეს, ეს შეიძლება მოდიოდეს მხოლოდ რუსეთიდან. კადიროვი ამას პირადად რა თქმა უნდა არ აკეთებს, მაგრამ თუ ვინმეს დაუკვეთავს მკვლელობას, ეს იქნება დაჯგუფება, რომელიც ამაზე მუშაობს. თუ ვინმეს ჩემი ლიკვიდაცია მოუნდება ეს არის რუსეთი, ეს არის რამზან კადიროვი, რაც ნიშნავს პუტინს", - განაცხადა გიორგი გაბუნიამ.
