“ქართული ოცნება” რაჭა-ლეჩხუმ-სვანეთის მაჟორიტარი დეპუტატობის კანდიდატად სახელმწიფო რწმუნებულს რაჭა-ლეჩხუმისა და ქვემო სვანეთის რეგიონში არჩილ ჯაფარიძეს წარდგენას გეგმავს.
როგორც რეგიონში საუბრობენ, წარმატებული გუბერნატორი დიდი ავტორიტეტით სარგებლობს სამაჟორიტარო ოლქის ხუთივე მუნიციპალიტეტში. მას ამომრჩევლების სახით დიდი დასყრდენი ჰყავს ჰესების ეპიცენტრში მყოფ ონისა და ლენტეხის მუნიციპალიტეტებში, რაც დიდი უპირატესობა იქნება საარჩევნო ბატალიებში მონაწილე კანდიდატისთვის.
ადგილობრივები არჩილ ჯაფარიძის საქმიანობას დადებითად აფასებენ და მის მიერ გაკეთებული საქმით კმაყოფილი არიან. მათი თქმით, გუბერნატორი რეგიონისთვის ძალიან ბევრს აკეთებს, უყურადღებოდ არავის ტოვებს, დიდ ყურადღებას აქცევს სასოფლო-სამეურნეო და ინფრასტრუქტურული პროექტების განხორციელებას.
მოსახლეობა აცხადებს, რომ ახლაც, კორონავირუსის პანდემიის დროს, არჩილ ჯაფარიძე პირადად არის ჩართული ყველაფერში, იჩენს ყურადღებას თითქმის 24-საათიან რეჟიმში, რომ ყველა მოქალაქეს შესაბამისი დახმარება აღმოუჩინონ.
როგორც ამბობენ, მოქმედ გუბერნატორს დეპუტატის მანდატის მოპოვებაში დაეხმარება გამოცდილი პარლამენტარი ვიქტორ ჯაფარიძეც, რომელიც საკმაოდ დიდი ავტორიტეტით სარგებლობს ზემო სვანეთში და მისი მხარდაჭერა გადამწყვეტი იქნება სარჩევნო პერიპეტიებში ჩართული ნებისმიერი პრეტენდენტისთვის.
თუმცა, როგორც ირკვევა, ამავე რეგიონის მაჟორიტარობაზე პრეტენზიას მოქმედი დეპუტატი გოჩა ენუქიძეც კვლავ აცხადებს. როგორც ადგილობრივები ამბობენ, ენუქიძე საარჩევნო კამპანიას უკვე აწარმოებს და კომპიუტერებს არიგებს.
რეგიონის მოსახლეობა აცხადებს, რომ გოჩა ენუქიძეს ისინი მხოლოდ არჩევნებზე ახსენდება და მის მიერ წინაასაარჩევნო კამპანიის დროს გაცემული დაპირებები არ ხორციელდება. მათი თქმით, მოქმედი დეპუტატი დროს და სიტუაციას საკუთარი თავის სასარგებლოდ ყოველთვის ერგება და მისი იმედი ნაკლებად შეიძლება ჰქონდეთ.
მოკლედ, ადგილობრივები ისე ჩივიან ენუქიძის უყურადღებობას, რომ მას ალბათ, რაჭა-ლეჩხუმ-სვანეთის მაჟორიტარობის იმედი აღარც უნდა ქონდეს, თუ კიდევ ერთხელ, რამენაირად, მის სასარგებლოდ არ შემოაბრუნა ყველაფერი.